യുഎഇയിലെ സ്കൂൾ പ്രവേശനത്തിനുള്ള പ്രായപരിധി (Age Cut-off) പരിഷ്കരിച്ചതിനെത്തുടർന്ന് തങ്ങളുടെ കുട്ടികൾക്കുണ്ടാകുന്ന പ്രായോഗിക ബുദ്ധിമുട്ടുകളിൽ ആശങ്കയറിയിച്ച് രക്ഷിതാക്കൾ. പുതിയ നിയമപ്രകാരം പ്രവേശന തീയതി ഓഗസ്റ്റ് 31-ൽ നിന്ന് ഡിസംബർ 31-ലേക്ക് മാറ്റിയത് പല കുട്ടികൾക്കും ഒരു വർഷം നഷ്ടപ്പെടാതെ നേരത്തെ സ്കൂളിൽ ചേരാൻ അവസരമൊരുക്കുമെങ്കിലും, ഇത് കുട്ടികളുടെ മാനസികവും സാമൂഹികവുമായ വളർച്ചയെ ബാധിക്കുമോ എന്നാണ് രക്ഷിതാക്കളുടെ പ്രധാന ആശങ്ക.
നഗരത്തിലെ ഗതാഗത സുരക്ഷ വർധിപ്പിക്കുന്നതിന്റെ ഭാഗമായി ഇലക്ട്രിക് ബൈക്കുകൾക്കും സ്കൂട്ടറുകൾക്കും കർശന നിയന്ത്രണങ്ങളുമായി അബുദാബി സംയോജിത ഗതാഗത കേന്ദ്രം (ITC). പുതിയ നിയമപ്രകാരം ഇ-ബൈക്കുകളുടെ പരമാവധി വേഗപരിധി മണിക്കൂറിൽ 20 കിലോമീറ്ററായി നിശ്ചയിച്ചു.
16 വയസ്സിന് താഴെയുള്ളവർക്ക് ഇ-ബൈക്ക് ഓടിക്കാൻ പാടില്ല
ഹെൽമറ്റ് നിർബന്ധം; രാത്രി റിഫ്ലക്ടീവ് വസ്ത്രങ്ങൾ ധരിക്കണം
ഒരാൾക്ക് മാത്രം യാത്ര അനുവദനം
സീബ്രാ ക്രോസിൽ ഇ-ബൈക്ക് ഓടിക്കരുത്
യാത്രയ്ക്കിടെ മൊബൈൽ/ഹെഡ്‌ഫോൺ ഉപയോഗിക്കരുത്
മുന്നിൽ വെള്ള ലൈറ്റ്, പിന്നിൽ ചുവന്ന ലൈറ്റ്/റിഫ്ലക്ടർ വേണം
പ്രവർത്തനക്ഷമമായ ബ്രേക്ക്, ബെൽ നിർബന്ധം
വാടക ഇ-ബൈക്കുകളിൽ ജിപിഎസ് ട്രാക്കിങ് വേണം
നിയമലംഘനം നടത്തിയാൽ 500 ദിർഹം വരെ പിഴ. ആവർത്തിച്ചാൽ ഇ-ബൈക്ക് കണ്ടുകെട്ടും
സൗദി അറേബ്യയുടെ തലസ്ഥാനമായ റിയാദിനെയും തുറമുഖ നഗരമായ ജിദ്ദയെയും ബന്ധിപ്പിച്ചുകൊണ്ടുള്ള വൻകിട റെയിൽവേ പദ്ധതിയായ ‘സൗദി ലാൻഡ് ബ്രിഡ്ജ്’ (Saudi Landbridge) 2034-ഓടെ പൂർത്തിയാകുമെന്ന് അധികൃതർ. ഈ പാത യാഥാർത്ഥ്യമാകുന്നതോടെ 950 കിലോമീറ്റർ അകലെയുള്ള ഇരു നഗരങ്ങൾക്കുമിടയിലെ യാത്രാ ദൈർഘ്യം വെറും 4 മണിക്കൂറായി കുറയും. നിലവിൽ റോഡ് മാർഗമുള്ള യാത്രയ്ക്ക് 9 മുതൽ 12 മണിക്കൂർ വരെയും വിമാന മാർഗമാണെങ്കിൽ ഒന്നേമുക്കാൽ മണിക്കൂറും എടുക്കും.
2025-ൽ യാത്രക്കാരുടെ എണ്ണത്തിൽ റെക്കോർഡ് വളർച്ച രേഖപ്പെടുത്തി ഷാർജ ടാക്സി. കഴിഞ്ഞ വർഷം മാത്രം 93.1 ലക്ഷം (9.31 ദശലക്ഷം) യാത്രക്കാരെ ഷാർജ ടാക്സി സുരക്ഷിതമായി ലക്ഷ്യസ്ഥാനങ്ങളിൽ എത്തിച്ചു. 2024-നെ അപേക്ഷിച്ച് യാത്രക്കാരുടെ എണ്ണത്തിൽ 25 ശതമാനം വർധനയാണ് ഉണ്ടായതെന്ന് അധികൃതർ വ്യക്തമാക്കി.
സ്മാർട്ട് സംവിധാനങ്ങളുടെ ഏകോപനവും മികച്ച സേവനവുമാണ് ഈ നേട്ടത്തിന് പിന്നിലെന്ന് ഷാർജ ടാക്സി അറിയിച്ചു. ‘യാംഗോ’ (Yango) സ്മാർട്ട് ആപ്ലിക്കേഷൻ വഴി മാത്രം 9.17 ലക്ഷം പേർ യാത്രകൾ ബുക്ക് ചെയ്തു. കൂടാതെ കിഴക്കൻ, മധ്യ മേഖലകളിലായി 7.6 ലക്ഷം യാത്രക്കാർക്കും സേവനം നൽകി.
ആഗോള വിപണിയിലെ മാറ്റങ്ങൾക്കനുസരിച്ച് ദുബായിൽ സ്വർണ്ണവില വീണ്ടും കുതിച്ചുയരുന്നു. നിക്ഷേപകർ ഏറെ താൽപ്പര്യപ്പെടുന്ന 24 കാരറ്റ് സ്വർണ്ണത്തിന്റെ വില ഗ്രാമിന് 600 ദിർഹം എന്ന ചരിത്ര നേട്ടത്തിലേക്ക് അടുക്കുകയാണ്. ആഗോള വിപണിയിൽ സ്വർണ്ണത്തിന് ആവശ്യക്കാർ ഏറിയതും ഡോളറിന്റെ മൂല്യത്തിലുണ്ടായ ഇടിവുമാണ് വില വർധനയ്ക്ക് പ്രധാന കാരണമായി ചൂണ്ടിക്കാണിക്കപ്പെടുന്നത്.
നിലവിൽ ദുബായ് വിപണിയിൽ 24 കാരറ്റ് സ്വർണ്ണത്തിന് ഗ്രാമിന് പുതിയ റെക്കോർഡ് വിലയാണ് രേഖപ്പെടുത്തുന്നത്. മറ്റ് കാരറ്റുകളിലും (22K, 21K, 18K) ആനുപാതികമായ വർധനയുണ്ടായിട്ടുണ്ട്.
വരാനിരിക്കുന്ന വ്രതമാസത്തിൽ പുണ്യപ്രവൃത്തികളുടെ ഭാഗമായി ടെന്റുകൾ സ്ഥാപിക്കുന്നവർക്കായി ദുബായ് മുനിസിപ്പാലിറ്റിയും ഇസ്ലാമിക് അഫയേഴ്‌സ് ആൻഡ് ചാരിറ്റബിൾ ആക്ടിവിറ്റീസ് ഡിപ്പാർട്ട്‌മെന്റും (IACAD) പുതിയ മാർഗ്ഗനിർദ്ദേശങ്ങൾ പുറപ്പെടുവിച്ചു.
നിർദേശങ്ങൾ പ്രകാരം ടെൻ്റിന് 60 ചതുരശ്ര മീറ്ററിൽ കൂടുതൽ വിസ്തീർണം പാടില്ല. ഉയരം അഞ്ച് മീറ്ററിൽ കവിയാനും അനുവദനീയമല്ല. റോഡുകളിലോ നടപ്പാതകളിലോ തടസം സൃഷ്ടിക്കുന്ന തരത്തിൽ ടെൻ്റുകൾ സ്ഥാപിക്കരുതെന്നും അധികൃതർ വ്യക്തമാക്കി.
കമ്പിളി, ബദൂയിൻ തുണികൾ, ടാർപോളിൻ തുടങ്ങിയ വസ്തുക്കൾ മാത്രമേ റമദാൻ ടെൻ്റുകളുടെ നിർമ്മാണത്തിന് ഉപയോഗിക്കാൻ പാടുള്ളൂ.
ടെൻ്റ് സ്ഥാപിക്കുന്നതിനുള്ള അപേക്ഷ ഡിജിറ്റൽ ഐഡി ഉപയോഗിച്ച് ലോഗിൻ ചെയ്ത് ഓൺലൈനായി സമർപ്പിക്കാം. അപേക്ഷയ്ക്ക് ഫീസോ മറ്റ് രേഖകളോ ആവശ്യമായിട്ടില്ല. ബന്ധപ്പെട്ട അധികൃതർ അനുമതി നൽകിയാൽ ടെൻ്റ് സ്ഥാപിക്കാമെന്ന് അറിയിപ്പിൽ വ്യക്തമാക്കി.
അൽ ഷിന്ദഗ ചരിത്ര പ്രദേശത്ത് നടക്കുന്ന സിക്ക ആർട്ട് ആൻഡ് ഡിസൈൻ ഫെസ്റ്റിവലിലേക്ക് (Sikka Art & Design Festival) എത്തുന്നവർക്കായി പ്രത്യേക ഗതാഗത സൗകര്യങ്ങൾ പ്രഖ്യാപിച്ച് ആർ.ടി.എ. ഫെസ്റ്റിവൽ വേദിയിലെ തിരക്ക് ഒഴിവാക്കുന്നതിനായി സന്ദർശകർക്കായി നിശ്ചിത പാർക്കിംഗ് കേന്ദ്രങ്ങൾ സജ്ജമാക്കിയിട്ടുണ്ട്. ഇവിടെ നിന്ന് സന്ദർശകർക്ക് ഫെസ്റ്റിവൽ വേദിയിലേക്ക് നേരിട്ട് എത്തുന്നതിനായി സൗജന്യ ഷട്ടിൽ ബസ് സർവീസുകളും ലഭ്യമാണ്.
പാർക്കിംഗ് കേന്ദ്രങ്ങൾ:
പോർട്ട് റാഷിദിലെ ഹംദാൻ ബിൻ മുഹമ്മദ് ക്രൂയിസ് ടെർമിനൽ 3: സന്ദർശകർക്ക് ഇവിടെ വാഹനം പാർക്ക് ചെയ്യാവുന്നതാണ്. ഇവിടെ നിന്ന് വേദിയിലേക്ക് സൗജന്യ ഷട്ടിൽ ബസ് സൗകര്യം ഉണ്ടായിരിക്കും.
അൽ ഗുബൈബ മെട്രോ സ്റ്റേഷനിലെ മൾട്ടി സ്റ്റോറി പാർക്കിംഗ്: മെട്രോ സ്റ്റേഷന് സമീപമുള്ള ഈ പാർക്കിംഗ് കേന്ദ്രവും സന്ദർശകർക്ക് ഉപയോഗിക്കാം.
ട്രാഫിക് പിഴകൾ കുടിശ്ശികയുണ്ടെന്ന് വിശ്വസിപ്പിച്ച് പൊതുജനങ്ങളിൽ നിന്ന് പണം തട്ടുന്ന പുതിയ സംഘങ്ങൾക്കെതിരെ ദുബായ് റോഡ് ഗതാഗത വകുപ്പ് (RTA) ജാഗ്രതാ നിർദ്ദേശം നൽകി. കുടിശ്ശികയുള്ള ചെറിയ തുക ഉടൻ അടച്ചില്ലെങ്കിൽ 500 ദിർഹം (Dh500) അധിക പിഴ ഇന്ന് തന്നെ ചുമത്തുമെന്ന് ഭീഷണിപ്പെടുത്തിക്കൊണ്ടുള്ള എസ്.എം.എസ് (SMS) സന്ദേശങ്ങളാണ് പലർക്കും ലഭിക്കുന്നത്.
സന്ദേശത്തോടൊപ്പം നൽകിയിരിക്കുന്ന ലിങ്കുകളിൽ ക്ലിക്ക് ചെയ്യുന്നതോടെ ഉപഭോക്താക്കളുടെ ബാങ്ക് വിവരങ്ങളും മറ്റ് വ്യക്തിഗത വിവരങ്ങളും തട്ടിയെടുക്കുകയാണ് ഇത്തരം സംഘങ്ങളുടെ രീതി.
യുഎഇയിൽ ശൈത്യം കടുക്കുന്നു. രാജ്യത്തിന്റെ വിവിധ ഭാഗങ്ങളിൽ താപനില കുത്തനെ താഴുന്നതായാണ് റിപ്പോർട്ടുകൾ. ഇന്ന് പുലർച്ചെ 5:45-ന് റാസൽഖൈമയിലെ ജബൽ ജൈസ് മലനിരകളിൽ താപനില 0.2 ഡിഗ്രി സെൽഷ്യസ് വരെ താഴ്ന്നതായി ദേശീയ കാലാവസ്ഥാ നിരീക്ഷണ കേന്ദ്രം (NCM) സ്ഥിരീകരിച്ചു.
ഷാർജയിലെ വ്യാവസായിക മേഖലകളിൽ സിവിൽ ഡിഫൻസ് പരിശോധന ശക്തമാക്കി. ജീവനും സ്വത്തിനും സംരക്ഷണം നൽകുന്നതിനും സ്ഥാപനങ്ങളുടെ സുരക്ഷാ സന്നദ്ധത വർദ്ധിപ്പിക്കുന്നതിനുമാണ് ഈ പ്രത്യേക കാമ്പെയ്ൻ സംഘടിപ്പിക്കുന്നത്.ഓട്ടോ സ്പെയർ പാർട്‌സ് വെയർഹൗസുകൾ, മെയിന്റനൻസ് വർക്ക്ഷോപ്പുകൾ, കത്തുന്ന വസ്തുക്കൾ സൂക്ഷിക്കുന്ന സംഭരണ കേന്ദ്രങ്ങൾ എന്നിവിടങ്ങളിലാണ് പ്രധാനമായും പരിശോധന നടക്കുന്നത്.
