Abudhabi

അബുദാബി : വിദ്യാഭ്യാസവും സംസ്കാരവും നൂതന ആശയങ്ങളും കൈമാറുന്നതിലൂടെ യു.എ.ഇയും ഇന്ത്യയും തമ്മിലുള്ള ബന്ധം കൂടുതൽ ശക്തമാക്കാൻ ലക്ഷ്യമിടുന്ന യു.എ.ഇ–ഇന്ത്യ ലീഡേഴ്സ് പ്രോഗ്രാം വിജയകരമായി മുന്നേറുന്നു. ഇതിന്റെ ഭാഗമായി ഇന്ത്യയിൽ സന്ദർശനം നടത്തിയ 60 എമിറാത്തി പ്രൊഫഷണലുകളും സർവ്വകലാശാലാ വിദ്യാർത്ഥികളും തങ്ങളുടെ പഠനയാത്ര പൂർത്തിയാക്കി യു.എ.ഇയിൽ തിരിച്ചെത്തി. സന്ദർശന വേളയിൽ ലഭിച്ച അനുഭവങ്ങളും അറിവും ഉപയോഗപ്പെടുത്തി നിർണ്ണായകമായ പ്രോജക്റ്റുകൾ വികസിപ്പിക്കാനാണ് ഇവർ ഇപ്പോൾ ലക്ഷ്യമിടുന്നത്. സെയ്ദ് എഡ്യൂക്കേഷൻ ഫൗണ്ടേഷന്റെ നേതൃത്വത്തിലാണ് ഈ പരിപാടി സംഘടിപ്പിക്കുന്നത്.

രാജ്യത്തിന്റെ ഭാവി രൂപപ്പെടുത്തുന്ന പ്രധാന മേഖലകളിൽ അറിവും കാഴ്ചപ്പാടും വളർത്തിയെടുക്കുക എന്ന ലക്ഷ്യത്തോടെയാണ് ഈ പദ്ധതി നടപ്പിലാക്കുന്നത്. അന്താരാഷ്ട്ര ബന്ധങ്ങൾ, ശാസ്ത്ര-സാങ്കേതികവിദ്യയും സുസ്ഥിരതയും, കലയും സംസ്കാരവും എന്നിങ്ങനെ മൂന്ന് വ്യത്യസ്ത വിഭാഗങ്ങളിലായാണ് പങ്കാളികളെ തിരിച്ചിരുന്നത്. സർക്കാർ പ്രതിനിധികൾ, അക്കാദമിക് വിദഗ്ധർ, സാംസ്കാരിക പ്രവർത്തകർ എന്നിവരുമായുള്ള ചർച്ചകളും വിവിധ മേഖലകളിലെ നേരിട്ടുള്ള ഇടപെടലുകളും ഈ പഠനയാത്രയുടെ ഭാഗമായിരുന്നു. ന്യൂഡൽഹി, മുംബൈ, ജയ്പൂർ, ബാംഗ്ലൂർ എന്നീ നഗരങ്ങൾ സന്ദർശിച്ച സംഘം ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജി (IIT), ഇന്ത്യൻ ഇൻസ്റ്റിറ്റ്യൂട്ട് ഓഫ് മാനേജ്‌മെന്റ് ബാംഗ്ലൂർ (IIMB), മുംബൈ സ്റ്റോക്ക് എക്‌സ്‌ചേഞ്ച് തുടങ്ങിയ പ്രമുഖ സ്ഥാപനങ്ങളും സന്ദർശിച്ചു.

പഠനത്തിനൊപ്പം തന്നെ ഇന്ത്യയുടെ വൈവിധ്യമാർന്ന സംസ്കാരം മനസ്സിലാക്കാനും ഇവർക്ക് അവസരം ലഭിച്ചു. ജയ്പൂർ ലിറ്ററേച്ചർ ഫെസ്റ്റിവൽ, താജ്മഹൽ, പ്രാദേശിക വിപണികൾ എന്നിവ സന്ദർശിച്ച സംഘം ഇന്ത്യയുടെ രാഷ്ട്രീയവും സാമ്പത്തികവും സാമൂഹികവുമായ പശ്ചാത്തലത്തെക്കുറിച്ച് ആഴത്തിലുള്ള അറിവ് നേടി. ന്യൂഡൽഹിയിലെ യു.എ.ഇ എംബസിയിലെയും മുംബൈയിലെ യു.എ.ഇ കോൺസുലേറ്റിലെയും ഉദ്യോഗസ്ഥരുമായി നടത്തിയ കൂടിക്കാഴ്ച നയതന്ത്ര ബന്ധങ്ങൾ മെച്ചപ്പെടുത്താൻ സഹായിച്ചു. ഭാവിയിൽ ഇരു രാജ്യങ്ങൾക്കും ഗുണകരമാകുന്ന രീതിയിലുള്ള പ്രവർത്തനങ്ങൾ കാഴ്ചവെക്കാൻ പ്രാപ്തിയുള്ള ഒരു പുതിയ തലമുറ നേതാക്കളെ വാർത്തെടുക്കാനാണ് ഈ പദ്ധതിയെന്ന് സെയ്ദ് എഡ്യൂക്കേഷൻ ഫൗണ്ടേഷൻ വക്താവ് വ്യക്തമാക്കി.