ഷാർജ : ഇത്തിഹാദ് റെയിൽവേ സ്റ്റേഷൻ റോഡുകളുടെ നിർമ്മാണവുമായി ബന്ധപ്പെട്ട് ഷാർജ യൂണിവേഴ്സിറ്റി സിറ്റിക്കും ഇൻസ്റ്റിറ്റ്യൂട്ട് ലാൻഡിനും ഇടയിൽ താൽക്കാലിക ഗതാഗത നിയന്ത്രണം ഏർപ്പെടുത്തുന്നു. 2026 ജൂലൈ 4 മുതൽ ഓഗസ്റ്റ് 23 വരെ ഒരു മാസത്തിലധികം കാലയളവിലാണ് ഈ റോഡ് മാറ്റങ്ങൾ ഉണ്ടാകുക. ഭാവിയാത്ര സുഗമമാക്കുന്നതിനുള്ള വികസന പ്രവർത്തനങ്ങൾ ആയതിനാൽ ഡ്രൈവർമാർ താൽക്കാലിക നിയന്ത്രണങ്ങളോട് സഹകരിക്കണമെന്ന് അധികൃതർ അഭ്യർത്ഥിച്ചു.
ദുബായ്: കോവിഡ് പ്രതിസന്ധിയെത്തുടർന്ന് താൽക്കാലികമായി നിർത്തിവെച്ചിരുന്ന മിഡിൽ ഈസ്റ്റ് സർവീസുകൾ ടർക്കിഷ് എയർലൈൻസ് ഘട്ടഘട്ടമായി പുനരാരംഭിക്കുന്നു. ഇതിന്റെ ഭാഗമായി ജൂലൈ ഒന്നു മുതൽ അബുദാബിയിലേക്കുള്ള സർവീസുകൾ എയർലൈൻ വീണ്ടും ആരംഭിച്ചു. വരും ദിവസങ്ങളിൽ കൂടുതൽ ഗൾഫ് രാജ്യങ്ങളിലേക്ക് സർവീസ് വ്യാപിപ്പിക്കാനാണ് കമ്പനിയുടെ തീരുമാനം. ഇതനുസരിച്ച് ജൂലൈ 10-ന് ദമ്മാമിലേക്കും, ജൂലൈ 11-ന് കുവൈറ്റിലേക്കും, ജൂലൈ 16-ന് ബഹ്‌റൈനിലേക്കും ടർക്കിഷ് എയർലൈൻസ് സർവീസുകൾ പുനരാരംഭിക്കും. നേരത്തെ ജൂൺ 9 മുതൽ ദുബായിലേക്കുള്ള സർവീസുകൾ കമ്പനി പുനഃസ്ഥാപിച്ചിരുന്നു. അബുദാബി സർവീസ് കൂടി യാഥാർത്ഥ്യമായതോടെ യുഎഇയിലെ യാത്രക്കാർക്ക് ഇസ്താംബുൾ വഴി ലോകത്തിന്റെ വിവിധ കോണുകളിലേക്ക് കണക്റ്റിവിറ്റി ലഭിക്കാനുള്ള അവസരമാണ് ഒരുങ്ങുന്നത്.
ഷാർജ : യുഎഇയുടെ അഭിമാന പദ്ധതിയായ ഇത്തിഹാദ് റെയിൽവേ സ്റ്റേഷനിലേക്കുള്ള റോഡ് നിർമ്മാണ പ്രവർത്തനങ്ങളുമായി ബന്ധപ്പെട്ട് ഷാർജയിൽ താൽക്കാലിക ഗതാഗത നിയന്ത്രണം ഏർപ്പെടുത്തുന്നതായി ഷാർജ റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (SRTA) അറിയിച്ചു. 2026 ജൂലൈ മുതൽ ഓഗസ്റ്റ് വരെയാണ് ഈ പുതിയ നിയന്ത്രണം പ്രാബല്യത്തിൽ വരിക. യൂണിവേഴ്സിറ്റി സിറ്റിക്കും അർദ് അൽ മാഹിദിനും ഇടയിലുള്ള റോഡുകളിലാണ് നിർമ്മാണ പ്രവർത്തനങ്ങൾ നടക്കുന്നത്. മേഖലയിലെ അടിസ്ഥാന സൗകര്യങ്ങൾ വികസിപ്പിക്കുന്നതിനും ഭാവിയിൽ കൂടുതൽ സുഗമമായ ഗതാഗതം ഉറപ്പാക്കുന്നതിനുമായാണ് ഈ താൽക്കാലിക ക്രമീകരണം. ഈ റൂട്ടിലൂടെ യാത്ര ചെയ്യുന്നവർ പകരമുള്ള റോഡുകൾ ഉപയോഗിക്കണമെന്നും അധികൃതർ നിർദ്ദേശിച്ചിട്ടുണ്ട്.
അബുദാബി : കൽബയിൽ താമസിക്കുന്ന സ്വദേശി ഉദ്യോഗസ്ഥൻ അബ്ദുൾറഹ്മാൻ അൽ സാബിക്ക് ഇത്തിഹാദ് റെയിലിന്റെ യാത്രാ സർവീസ് വെറുമൊരു നാഴികക്കല്ലല്ല, മറിച്ച് തന്റെ ജീവിതം തന്നെ മാറ്റിമറിച്ച വലിയൊരു സൗകര്യമാണ്. അബുദാബിയിലെ അൽ ബത്തീൻ എക്സിക്യൂട്ടീവ് എയർപോർട്ടിലേക്ക് ജോലിക്ക് പോകാനായി ഫുജൈറയിൽ നിന്നുള്ള പുലർച്ചെ 5.34-ലെ ആദ്യ ട്രെയിനിലെ യാത്രക്കാരിൽ ഒരാളായിരുന്നു അദ്ദേഹം. മുൻപ് കഠിനമായ ട്രാഫിക്കും മഞ്ഞും താണ്ടി മൂന്ന് മണിക്കൂറിലധികം കാറോടിച്ച് ജോലിക്ക് പോയിരുന്ന സാബിക്ക്, പുതിയ ട്രെയിൻ വഴി വെറും 1 മണിക്കൂർ 40 മിനിറ്റ് കൊണ്ട് അബുദാബിയിൽ തടസ്സങ്ങളില്ലാതെ എത്തുവാൻ സാധിച്ചു.
മണിക്കൂറിൽ 200 കിലോമീറ്റർ വേഗതയുള്ള ഈ ട്രെയിൻ യാത്ര റോഡിലെ കടുത്ത മാനസിക സമ്മർദ്ദങ്ങളിൽ നിന്നും യാത്രാക്ഷീണത്തിൽ നിന്നും വലിയ ആശ്വാസം നൽകിയതായി അദ്ദേഹം പറഞ്ഞു. ട്രെയിനിലെ സൗജന്യ വൈ-ഫൈ ഉപയോഗിച്ച് യാത്രയ്ക്കിടയിൽ തന്നെ ജോലി പൂർത്തിയാക്കാനും രുചികരമായ ഭക്ഷണം ആസ്വദിക്കാനും കഴിഞ്ഞു. യാത്രക്കാർക്കായി വൈ-ഫൈ, ചാർജിങ് പോർട്ടുകൾ എന്നിവയടങ്ങിയ ഇത്തിഹാദ് റെയിൽ സർവീസിൽ അബുദാബി–ഫുജൈറ റൂട്ടിൽ കംഫർട്ട് ക്ലാസിന് 55 ദിർഹവും പ്രീമിയം ക്ലാസിന് 120 ദിർഹവുമാണ് ടിക്കറ്റ് നിരക്ക്.
ഷാർജ : പൊതു പാർക്കിങ് സമയം അർദ്ധരാത്രി 12 മണി വരെ നീട്ടിയ ഷാർജ മുനിസിപ്പാലിറ്റിയുടെ പുതിയ നിയമം നിലവിൽ വന്ന ആദ്യദിനത്തിൽ സമ്മിശ്ര പ്രതികരണവുമായി താമസക്കാർ. മുൻപുണ്ടായിരുന്ന രാത്രി 10 മണി എന്ന സമയപരിധി ജൂലൈ 1 മുതലാണ് 12 മണി വരെയാക്കി നീട്ടിയത്. നിയമം വന്നതോടെ അൽ നഹ്ദ ഉൾപ്പെടെയുള്ള ചില താമസ മേഖലകളിൽ രാത്രി വൈകിയും എളുപ്പത്തിൽ പാർക്കിങ് ലഭിച്ചതായി ചിലർ വ്യക്തമാക്കിയപ്പോൾ, റോഡ് പണികളും കനത്ത ട്രാഫിക്കും കാരണം മറ്റ് ചിലയിടങ്ങളിൽ ഇപ്പോഴും പ്രതിസന്ധി തുടരുകയാണ്.
റസ്റ്റോറന്റുകളും വാണിജ്യ സ്ഥാപനങ്ങളും നിറഞ്ഞ അൽ മജാസ് പോലുള്ള തിരക്കേറിയ സ്ഥലങ്ങളിൽ ആദ്യദിവസം വലിയ മാറ്റമൊന്നും പ്രകടമായില്ലെന്ന് താമസക്കാർ പറയുന്നു. എന്നാൽ പാർക്കിങ് ദുരുപയോഗം തടയാനും സന്ദർശകർക്ക് കൂടുതൽ സൗകര്യം ഒരുക്കാനും ഈ പുതിയ സമയമാറ്റം ദീർഘകാലാടിസ്ഥാനത്തിൽ ഉപകരിക്കുമെന്നാണ് അധികൃതരുടെ വിലയിരുത്തൽ. വരും ദിവസങ്ങളിലെയും വാരാന്ത്യങ്ങളിലെയും (Weekend) തിരക്ക് കൂടി അനുഭവപ്പെട്ടതിന് ശേഷമേ പുതിയ നിയമത്തിന്റെ യഥാർത്ഥ സ്വാധീനം വ്യക്തമാകൂ എന്ന അഭിപ്രായത്തിലാണ് പൊതുജനങ്ങൾ.
ദുബായ് : വേനൽക്കാല അവധിക്കാലത്തെ തിരക്ക് കണക്കിലെടുത്ത് ഗൾഫ് മേഖലയിലേക്കുള്ള തങ്ങളുടെ സർവീസുകൾ എയർ ഇന്ത്യ എക്സ്പ്രസ് പൂർണ്ണമായി പുനഃസ്ഥാപിച്ച്. കുവൈറ്റ്, സലാല എന്നിവിടങ്ങളിലേക്കുള്ള സർവീസുകൾ കൂടി പുനരാരംഭിച്ചതോടെയാണ് എയർ ഇന്ത്യ എക്സ്പ്രസിന്റെ ഗൾഫ് ശൃംഖല പൂർണ്ണതോതിലായത്. കേരളം, കർണാടക എന്നിവിടങ്ങളിൽ നിന്നുള്ള യാത്രക്കാർക്ക് ഈ തീരുമാനം ഏറെ ആശ്വാസകരമാകും. വരും ദിവസങ്ങളിൽ ചില പ്രധാന റൂട്ടുകളിൽ സർവീസുകളുടെ എണ്ണം വർദ്ധിപ്പിക്കുമെന്നും എയർലൈൻ അധികൃതർ വ്യക്തമാക്കിയിട്ടുണ്ട്.
കോഴിക്കോട്–സലാല റൂട്ടിൽ ജൂലൈ 2 മുതൽ ചൊവ്വ, വ്യാഴം ദിവസങ്ങളിൽ ആഴ്ചയിൽ രണ്ട് സർവീസുകൾ വീതവും, കോഴിക്കോട്–കുവൈറ്റ് റൂട്ടിൽ ജൂലൈ 3 മുതൽ ആഴ്ചയിൽ മൂന്ന് സർവീസുകൾ വീതവും ലഭ്യമാകും. ബംഗളൂരു–കുവൈറ്റ് സർവീസുകൾ ജൂലൈ 4 മുതലും, മംഗലാപുരം–മസ്കറ്റ് സർവീസുകൾ ജൂലൈ 3 മുതലും പുനരാരംഭിക്കും. കുവൈറ്റിലേക്കുള്ള എയർ ഇന്ത്യ എക്സ്പ്രസ് വിമാനങ്ങൾ കുവൈറ്റ് അന്താരാഷ്ട്ര വിമാനത്താവളത്തിലെ ടെർമിനൽ 4-ൽ നിന്നായിരിക്കും സർവീസ് നടത്തുക. നിലവിൽ ഇന്ത്യയിലെ 18 നഗരങ്ങളെ ഗൾഫിലെ 13 കേന്ദ്രങ്ങളുമായി ബന്ധിപ്പിച്ച് ആഴ്ചയിൽ 780-ഓളം സർവീസുകളാണ് എയർലൈൻ നടത്തുന്നത്.
അബുദാബി : യുഎഇയുടെ ദേശീയ റെയിൽ ശൃംഖലയായ ഇത്തിഹാദ് റെയിൽ യാത്രക്കാർക്കായി വിശദമായ പെരുമാറ്റച്ചട്ടങ്ങളും സുരക്ഷാ മാർഗ്ഗനിർദ്ദേശങ്ങളും പുറത്തിറക്കി. സുഗമമായ യാത്ര ഉറപ്പാക്കുന്നതിനായി ട്രെയിനുകളിൽ സൈക്കിളുകൾ, ഇ-സ്‌കൂട്ടറുകൾ, മദ്യം, പുകവലി/വേപ്പിങ് ഉപകരണങ്ങൾ എന്നിവ പൂർണ്ണമായി നിരോധിച്ചിട്ടുണ്ട്. 14 വയസ്സിന് താഴെയുള്ള കുട്ടികൾക്ക് മുതിർന്നവരുടെ തുണയില്ലാതെ യാത്ര ചെയ്യാൻ അനുമതിയുണ്ടാകില്ല. നിശ്ചിത വലുപ്പമുള്ള കൂടുകളിലാക്കിയ വളർത്തുമൃഗങ്ങളെയും മടക്കാവുന്ന ബേബി സ്ട്രോളറുകളെയും കൂടെക്കൂട്ടാം. ട്രെയിൻ പുറപ്പെടുന്നതിന് കൃത്യം രണ്ട് മിനിറ്റ് മുൻപ് സ്റ്റേഷൻ ഗേറ്റുകൾ അടയ്ക്കുമെന്നും യാത്രക്കാർ ടിക്കറ്റുകൾ മുൻകൂട്ടി ബുക്ക് ചെയ്യണമെന്നും അധികൃതർ വ്യക്തമാക്കി.
ദുബായ് : രാവിലെ ഓഫീസുകളിലേക്കും മറ്റ് ആവശ്യങ്ങൾക്കുമായി ഇറങ്ങുന്നവരെ ബുദ്ധിമുട്ടിച്ച് ദുബായിലെ പ്രധാന പാതകളിൽ കനത്ത ഗതാഗതക്കുരുക്ക്. ഷാർജയിൽ നിന്നും ദുബായിലേക്ക് പ്രവേശിക്കുന്ന പ്രധാന റോഡുകളിലാണ് വാഹനങ്ങളുടെ വലിയ തിരക്ക് അനുഭവപ്പെടുന്നത്.
ഷെയ്ഖ് സായിദ് റോഡിൽ (E11) അൽ നഹ്ദ മുതൽ അബു ഹൈൽ വരെയും ട്രേഡ് സെന്റർ റൗണ്ട് എബൗട്ടിലും വാഹനങ്ങൾ സാവധാനത്തിലാണ് നീങ്ങുന്നത്. അൽ ഖൈൽ റോഡിൽ (E44) റാസ് അൽ ഖോർ, മെയ്ദാൻ, ദുബായ് ഹിൽസ് ഭാഗങ്ങളിലും ഗതാഗതം സ്ലോയാണ്. ഷെയ്ഖ് മുഹമ്മദ് ബിൻ സായിദ് റോഡിൽ (E311) മിർദിഫ് ഭാഗത്ത് കനത്ത തിരക്കുണ്ട്. അതേസമയം, എമിറേറ്റ്സ് റോഡിൽ (E611) ഗതാഗതം താരതമ്യേന സുഗമമാണ്. ഈ റൂട്ടുകളിൽ യാത്ര ചെയ്യുന്നവർ കൂടുതൽ സമയം കണക്കാക്കി ഇറങ്ങണമെന്നും സുരക്ഷിത അകലം പാലിക്കണമെന്നും അധികൃതർ നിർദ്ദേശിച്ചു.
അബുദാബി : എത്തിഹാദ് റെയിൽ തങ്ങളുടെ ആദ്യ യാത്രാ സർവീസുകൾ ആരംഭിച്ചതിന് പിന്നാലെ യാത്രക്കാർക്കായി അബുദാബിയിൽ 10 ദിർഹ നിരക്കിൽ ഷട്ടിൽ ബസ് സർവീസുകൾ പ്രഖ്യാപിച്ചു. അബുദാബി മുഹമ്മദ് ബിൻ സായിദ് സിറ്റി സ്റ്റേഷനിൽ നിന്നുമാണ് പ്രധാന കേന്ദ്രങ്ങളിലേക്ക് ബസ് സർവീസ് ഉണ്ടായിരിക്കുക.
ട്രെയിൻ ടിക്കറ്റ് ബുക്ക് ചെയ്യുന്ന സമയത്ത് തന്നെ ഈ ബസ് സർവീസും റിസർവ് ചെയ്യണം. സ്റ്റേഷനിൽ നിന്നും നേരിട്ട് ബുക്ക് ചെയ്യാൻ കഴിയില്ല. അഡ്‌നോക് ഹെഡ്ക്വാർട്ടേഴ്‌സ് (ADNOC HQ), അഡ്‌നെക് സെന്റർ (ADNEC Centre), റീം മാൾ (Reem Mall) എന്നീ മൂന്ന് പ്രധാന കേന്ദ്രങ്ങളിലേക്കാണ് സർവീസ്. ട്രെയിൻ സമയങ്ങളുമായി ബന്ധിപ്പിച്ചാണ് ബസുകൾ ക്രമീകരിച്ചിരിക്കുന്നത്. നഗരത്തിലെ പ്രധാന കേന്ദ്രങ്ങളിലേക്ക് എളുപ്പത്തിൽ എത്തുന്നതിനും പാർക്കിങ്, ട്രാഫിക് ബുദ്ധിമുട്ടുകൾ ഒഴിവാക്കുന്നതിനും ഈ ഷട്ടിൽ സർവീസ് യാത്രക്കാരെ സഹായിക്കും.
ദുബായ് : വേനലവധിക്കാലത്തെ വൻ തിരക്ക് കണക്കിലെടുത്ത് ദുബായ് വിമാനത്താവളത്തിൽ (DXB) യാത്രക്കാർ നേരത്തെ എത്തണമെന്ന് എമിറേറ്റ്സ് എയർലൈൻസിന്റെ മുന്നറിയിപ്പ്. പ്രത്യേകിച്ച് ജൂലൈ 3 മുതൽ 5 വരെയുള്ള ദിവസങ്ങളിൽ ടെർമിനൽ 3 വഴി പോകുന്നവർ ഫ്ലൈറ്റിന് 3 മണിക്കൂർ മുമ്പെങ്കിലും എയർപോർട്ടിൽ എത്തണം.
റോഡിലെ ഗതാഗതക്കുരുക്ക് ഒഴിവാക്കാൻ ദുബായ് മെട്രോ ഉപയോഗിക്കാനും, തിരക്ക് ഒഴിവാക്കാൻ ഓൺലൈൻ അല്ലെങ്കിൽ സിറ്റി ചെക്ക്-ഇൻ സൗകര്യങ്ങൾ പ്രയോജനപ്പെടുത്താനും നിർദ്ദേശമുണ്ട്. പവർ ബാങ്കുകളും ഇ-സിഗരറ്റുകളും ഹാൻഡ് ലഗേജിൽ മാത്രമേ വെയ്ക്കാവൂ എന്നും എമിറേറ്റ്സ് ഓർമ്മിപ്പിച്ചു.
