അബൂദബിയിൽ നിന്നും കണ്ണൂരിലേക്ക് പുറപ്പെടേണ്ട ഇൻഡിഗോ വിമാനം മണിക്കൂറുകളോളം വൈകുന്നത് യാത്രക്കാരെ വലയ്ക്കുന്നു. ഇന്ന് ഉച്ചയ്ക്ക് 1:20-ന് പുറപ്പെടേണ്ടിയിരുന്ന ഇൻഡിഗോ 6E 1434 വിമാനമാണ് നാല് മണിക്കൂറോളം വൈകുന്നത്. വിമാനം വൈകുമെന്ന വിവരം അധികൃതർ മുൻകൂട്ടി അറിയിച്ചില്ലെന്ന് യാത്രക്കാർ പരാതിപ്പെട്ടു. കൃത്യസമയത്ത് വിമാനത്താവളത്തിൽ എത്തിയ ശേഷമാണ് വിമാനം വൈകുമെന്ന കാര്യം പലരും അറിയുന്നത്.
അൽ ഐൻ മേഖലയിലെ സഖർ ഇന്റർസെക്ഷൻ ഔദ്യോഗികമായി തുറന്നു നൽകി. അടിസ്ഥാന സൗകര്യങ്ങൾ മെച്ചപ്പെടുത്തുന്നതിനുള്ള തുടർച്ചയായ ശ്രമങ്ങളുടെ ഭാഗമായാണ് ഈ നടപടി. സഖർ ഇന്റർ സെക്ഷൻ തുറന്നത് യാത്രാ സമയം ഗണ്യമായി കുറയ്ക്കുകയും ആയിരക്കണക്കിന് ഡ്രൈവർമാരുടെ റോഡ് സുരക്ഷ വർദ്ധിപ്പിക്കുകയും ചെയ്യുമെന്ന് പ്രതീക്ഷിക്കുന്നത്. നിർമ്മാണത്തിൽ, ഓരോ ദിശയിലും മൂന്ന് വരികളുള്ള 900 മീറ്റർ തുരങ്കമാണ് പ്രധാനമായും നിർമ്മിച്ചത്. 22 മാസമെടുത്താണ് പദ്ധതി പൂർത്തിയാക്കിയത്.
ശൈത്യകാല ക്യാമ്പിംഗ് നിയമങ്ങൾ പാലിക്കണമെന്ന് ഷാർജ പോലീസ് മുന്നറിയിപ്പ് നൽകി
ശൈത്യകാലം അടുക്കുന്നതോടെ ആയിരക്കണക്കിന് താമസക്കാരും വിനോദസഞ്ചാരികളും ക്യാമ്പിംഗിനായി ഷാർജയിലെ മരുഭൂമി, തുറന്ന പ്രദേശങ്ങളിലേക്ക് എത്തിച്ചേരും. ഈ പശ്ചാത്തലത്തിൽ, പൊതുസുരക്ഷയും പരിസ്ഥിതി സംരക്ഷണവും ഉറപ്പാക്കുന്നതിനായി ക്യാമ്പിംഗ് പ്രവർത്തനങ്ങൾ സംഘടിപ്പിക്കാനും നിയന്ത്രിക്കാനും അധികൃതർ ഒരുങ്ങിയതായി അറിയിച്ചു.
അനധികൃതമായി ക്യാമ്പ് ചെയ്യുന്ന സ്ഥലങ്ങളിൽ ശ്രദ്ധയുണ്ടാകുമെന്നും, നിയമം ലംഘിച്ച് ക്യാമ്പ് ചെയ്യുന്നവർക്ക് 2,000 ദിർഹംസ് പിഴ ചുമത്തുമെന്നും അധികൃതർ പൊതുജനങ്ങൾക്ക് മുന്നറിയിപ്പ് നൽകി. നിയമലംഘനം ആവർത്തിച്ചാൽ പിഴ ഇരട്ടിയാകുമെന്നും അവർ ഓർമ്മിപ്പിച്ചു.
ഒക്ടോബർ 17 മുതൽ 24 വരെ ഇന്ത്യയിലേക്കും തിരിച്ചുമുള വിമാനങ്ങളിൽ വിനോദവും മധുരവും
ദീപാവലി ആഘോഷത്തിന്റെ ഭാഗമായി യാത്രികർക്കായി മധുരവിഭവങ്ങൾ ഒരുക്കാൻ എമിറേറ്റ്സ് എയർലൈൻസ്. ഒക്ടോബർ 17 മുതൽ 24 വരെ ഇന്ത്യയിലേക്കും തിരിച്ചുമുള്ള സർവീസുകളിലാണ് ദീപാവലി പ്രത്യേകതകൾ ഒരുക്കുന്നത്. ദീപാവലി ആഘോഷത്തിന്റെ നിറവും മധുരവും ചേർത്ത് യാത്രാനുഭവം കൂടുതൽ ഉത്സവമാക്കാനാണ് എമിറേറ്റ്സിന്റെ ഈ പ്രത്യേക പരിപാടി.
അടുത്ത വർഷത്തോടെ ഷെയ്ഖ് സായിദ് റോഡിൽ ടാക്സികൾ പുറത്തിറക്കുമെന്ന് RTA
ദുബായിലെ പ്രധാന ഹൈവേയായ ഷെയ്ഖ് സായിദ് റോഡിൽ അടുത്ത വർഷത്തോടെ റോബോടാക്സികൾ അഥവാ സെൽഫ് ഡ്രൈവിംഗ് ടാക്സികൾ പുറത്തിറക്കുമെന്ന് RTA. 2030 ആകുമ്പോഴേക്കും ഗതാഗതത്തിന്റെ 25 ശതമാനവും സ്മാർട്ട്, ഡ്രൈവറില്ലാ ഗതാഗതമാക്കുക എന്ന ദുബായിയുടെ ലക്ഷ്യം കൈവരിക്കുന്നതിനുള്ള നിർണായക ചുവടുവയ്പ്പാണ് ഈ നീക്കം.
വിമാനത്താവളത്തിൽ വൻ പ്രതിഷേധം
ദുബായിൽ നിന്ന് ഡൽഹിയിലേക്ക് പുറപ്പെട്ട സ്പൈസ്ജെറ്റ് വിമാനത്തിലെ മുഴുവൻ യാത്രക്കാരുടെയും ലഗേജ് കൊണ്ടുപോകാൻ മറന്നതോടെ ഡൽഹി വിമാനത്താവളത്തിൽ വൻ ആശയക്കുഴപ്പവും പ്രതിഷേധവും ഉണ്ടായി. ബുധനാഴ്ച വൈകിട്ട് 148 യാത്രക്കാരുമായി ഡൽഹിയിലെ ഇന്ദിരാഗാന്ധി രാജ്യാന്തര വിമാനത്താവളത്തിലെ ടെർമിനൽ 3-ൽ വിമാനം എത്തിയപ്പോഴാണ് ബാഗുകൾ ഒന്നും എത്തിയിട്ടില്ലെന്ന വിവരം യാത്രക്കാർ അറിഞ്ഞത്. ലഗേജ് ലഭിക്കാതിരുന്നതിൽ യാത്രക്കാർ വിമാനത്താവള അധികൃതരോട് ശക്തമായി പ്രതിഷേധിച്ചു. സംഭവം സംബന്ധിച്ച് അന്വേഷണം ആരംഭിച്ചതായി വിമാനത്താവള വൃത്തങ്ങൾ അറിയിച്ചു.
എയർ ടാക്സികൾക്കുള്ള ആദ്യത്തെ ആശുപത്രി വെർട്ടിപോർട്ട് പ്രഖ്യാപിച്ച് അബുദാബി
രോഗികൾക്ക് മിനിറ്റുകൾക്കുള്ളിൽ ആശുപത്രിയിലെത്താൻ കഴിയുന്ന എയർ ടാക്സികൾക്കുള്ള യുഎഇയിലെ ആദ്യ ആശുപത്രി വെർട്ടിപോർട്ട് പ്രഖ്യാപിച്ചു. ക്ലീവ്ലാൻഡ് ക്ലിനിക് അബുദാബിയും ആർച്ചർ ഏവിയേഷൻ ഇൻകും ചേർന്നാണ് ഈ പദ്ധതി നടപ്പാക്കുന്നത്. പുതിയ വെർട്ടിപോർട്ടിൽ നിന്ന് എയർ ടാക്സികൾ പറന്നുയരുകയും ഇറങ്ങുകയും ചെയ്യും, അടിയന്തര രോഗികളെയും അവയവ ഗതാഗതത്തിനെയും വേഗത്തിൽ ആശുപത്രിയിലെത്തിക്കാനാണ് ലക്ഷ്യം.
ഒക്ടോബർ 31 വരെ ടിക്കറ്റ് ബുക്ക് ചെയ്യുന്നവർക്ക് പ്രയോജനപ്പെടുത്താം
ഗൾഫ് രാജ്യങ്ങളിലെ ഇന്ത്യൻ പ്രവാസികൾക്കായി എയർ ഇന്ത്യ എക്സ്പ്രസ് പ്രത്യേക ഉത്സവ ഓഫർ പ്രഖ്യാപിച്ചു. ഇന്ത്യയിലേക്കുള്ള വിമാനങ്ങളിൽ വെറും ഒരു ദിർഹത്തിന് 10 കിലോഗ്രാം അധിക ലഗേജ് അനുവദിക്കുന്നതാണ് ഓഫർ. 2025 ഒക്ടോബർ 31 മുമ്പ് ബുക്ക് ചെയ്യുന്ന, നവംബർ 30 വരെ ഉള്ള യാത്രകൾക്കാണ് ഈ പ്രമോഷൻ ബാധകമാകുന്നത്. യുഎഇ, സൗദി അറേബ്യ, കുവൈറ്റ്, ഒമാൻ, ബഹ്റൈൻ, ഖത്തർ തുടങ്ങിയ രാജ്യങ്ങളിൽ നിന്നുള്ള യാത്രക്കാർക്ക് ഓഫർ ലഭ്യമാകും.
യാത്രക്കാർക്ക് ബുക്കിംഗ് സമയത്ത് മാത്രമേ ഈ ഓഫർ ലഭ്യമാകൂ, ടിക്കറ്റ് ഇഷ്യൂ ചെയ്തതിനുശേഷം ഇത് ചേർക്കാൻ കഴിയില്ല. ഉത്സവ സീസണിൽ നാട്ടിലേക്ക് പോകുന്ന ആയിരക്കണക്കിന് ഇന്ത്യക്കാർക്ക് യാത്ര കൂടുതൽ സൗകര്യപ്രദവും താങ്ങാനാവുന്നതുമാക്കുന്നതിനാണ് ഈ സംരംഭം രൂപകൽപ്പന ചെയ്തിരിക്കുന്നതെന്ന് എയർലൈൻ അറിയിച്ചു.
നവംബർ 20 മുതൽ സർവീസ് ആരംഭിക്കും
യുഎഇയിൽ പ്രവർത്തനം അവസാനിപ്പിച്ച അൾട്രാ-ലോ-കോസ്റ്റ് എയർലൈൻ ആയ വിസ് എയർ മാസങ്ങള്ക്ക് ശേഷമാണ് സർവീസ് പുനരാരംഭിക്കുന്നത്. അടുത്ത മാസം നവംബർ 20 മുതൽ അബുദാബിയിലേക്ക് വിമാനങ്ങൾ വീണ്ടും പറന്നുയരും. വിസ് എയറിന്റെ വെബ്സൈറ്റിലെ വിവരങ്ങൾ പ്രകാരം, പോളണ്ടിലെ കാറ്റോവിസ്, ക്രാക്കോവ് നഗരങ്ങളിൽ നിന്ന് യുഎഇ തലസ്ഥാനത്തേക്കുള്ള ആദ്യ സർവീസുകൾ നവംബർ 20ന് ആരംഭിക്കും. കുറഞ്ഞ നിരക്കിലുള്ള ടിക്കറ്റുകളുടെ ബുക്കിംഗ് ഇതിനകം ആരംഭിച്ചു. ടിക്കറ്റ് നിരക്ക് ഏകദേശം 312 ദിർഹംസ് മുതലാണ് ആരംഭിക്കുന്നത്.
വിമാന ടിക്കറ്റ് നിരക്ക് 35 % ഉയരാൻ സാധ്യത.
യുഎഇയിൽ നിന്ന് കേരളത്തിലേക്ക് പോകുന്ന പ്രവാസികൾക്ക് ശൈത്യകാല അവധിയിൽ ടിക്കറ്റ് നിരക്കിൽ 35 ശതമാനം വരെ വർധനയുണ്ടാകാൻ സാധ്യത.
എയർ ഇന്ത്യ എക്സ്പ്രസിന്റെ സർവീസുകൾ കുറയ്ക്കുമെന്ന വാർത്തകൾക്കിടെയാണ് ഈ വർധനയുടെ സൂചനകൾ പുറത്തുവന്നത്. എന്നാൽ സർവീസുകൾ കുറയ്ക്കില്ലെന്നും നിലവിലുള്ള ഫ്ലൈറ്റുകൾ പുനഃസ്ഥാപിക്കുമെന്നും എയർ ഇന്ത്യ എക്സ്പ്രസ് വ്യക്തമാക്കി.
