യു.എസ് ഫെഡറൽ റിസർവ് പലിശ നിരക്ക് കുറയ്ക്കാനിരിക്കെ ദുബായിൽ സ്വർണ്ണവില വർദ്ധിച്ചു

ദുബായ് : യു.എസ് ഫെഡറൽ റിസർവ് പലിശ നിരക്ക് കുറയ്ക്കുന്നതുമായി ബന്ധപ്പെട്ട സുപ്രധാന പ്രഖ്യാപനത്തിന് മുന്നോടിയായി യുഎഇയിലും ആഗോള വിപണിയിലും സ്വർണ്ണവില വർദ്ധിച്ചു. ബുധനാഴ്ച രാവിലെ ദുബായ് ജ്വല്ലറി ഗ്രൂപ്പ് പുറത്തുവിട്ട വിവരങ്ങൾ അനുസരിച്ച് 24 കാരറ്റ് സ്വർണ്ണത്തിന് ഗ്രാമിന് 520.75 ദിർഹമായി ഉയർന്നു. ചൊവ്വാഴ്ച വിപണി അടയ്ക്കുമ്പോൾ ഇത് ഗ്രാമിന് 517.50 ദിർഹമായിരുന്നു.
സ്വർണ്ണത്തിന്റെ മറ്റ് വിഭാഗങ്ങളിലും ബുധനാഴ്ച രാവിലെ വിലവർദ്ധനവ് രേഖപ്പെടുത്തിയിട്ടുണ്ട്. 22 കാരറ്റ് സ്വർണ്ണത്തിന് ഗ്രാമിന് 482.25 ദിർഹമും 21 കാരറ്റിന് 462.25 ദിർഹമുമാണ് ഇന്നത്തെ നിരക്ക്. 18 കാരറ്റ് സ്വർണ്ണം ഗ്രാമിന് 396.25 ദിർഹമിലും 14 കാരറ്റ് സ്വർണ്ണം ഗ്രാമിന് 309.25 ദിർഹമിലുമാണ് വ്യാപാരം നടക്കുന്നത്. അമേരിക്കൻ കേന്ദ്ര ബാങ്കിന്റെ തീരുമാനം വരാനിരിക്കെ വരും ദിവസങ്ങളിലും സ്വർണ്ണവിലയിൽ ചാഞ്ചാട്ടങ്ങൾ പ്രതീക്ഷിക്കാം.