ദശലക്ഷം ദിർഹത്തിന് വിറ്റഴിഞ്ഞ് അപൂർവ്വ ഇബ്ൻ ബത്തൂത്ത കയ്യെഴുത്തുപ്രതി

അബുദാബി : പ്രശസ്ത സഞ്ചാരി ഇബ്ൻ ബത്തൂത്തയുടെ ലോകപ്രശസ്തമായ ‘രിഹ്‌ല’ (Rihla) യാത്രാവിവരണം അടങ്ങിയ അപൂർവ്വ കയ്യെഴുത്തുപ്രതി 35-ാമത് അബുദാബി അന്താരാഷ്ട്ര പുസ്തകോത്സവത്തിൽ (ADIBF 2026) ഏകദേശം ദശലക്ഷം ദിർഹത്തിന് (ഏകദേശം 2.25 കോടിയോളം രൂപ) വിറ്റഴിഞ്ഞു. ലണ്ടനിലെ പ്രമുഖ അപൂർവ്വ പുസ്തക വ്യാപാരികളായ പീറ്റർ ഹാരിംഗ്ടൺ മേളയിലെത്തിച്ച ഈ കയ്യെഴുത്തുപ്രതി, ഇബ്ൻ ബത്തൂത്തയുടെ 1325 മുതൽ 1333 വരെയുള്ള യാത്രകളെയും ഒമാൻ, യുഎഇ ഉൾപ്പെടെയുള്ള ഗൾഫ് മേഖലകളുടെ ആദ്യകാല ചരിത്രവിവരണങ്ങളെയും വിശദീകരിക്കുന്നതാണ്. ലോകത്താകമാനം ഈ കയ്യെഴുത്തുപ്രതിയുടെ പൂർണ്ണമോ ഭാഗികമോ ആയ 7 പകർപ്പുകൾ മാത്രമാണ് നിലവിലുള്ളത്.
മൊറോക്കോയിലെ ടാഞ്ചിയറിൽ ജനിച്ച ഇബ്ൻ ബത്തൂത്ത മൂന്ന് പതിറ്റാണ്ടുകളിലായി 1,20,000 കിലോമീറ്ററിലധികം ദൂരമാണ് സഞ്ചരിച്ചത്. തൻ്റെ യാത്രകൾക്കിടയിൽ ഷാർജയിലെ കൽബ, ഖോർഫക്കാൻ, ഒമാനിലെ നിസ്‌വ, ഖൽഹാത്ത് തുടങ്ങിയ സ്ഥലങ്ങളെക്കുറിച്ചും ബഹ്‌റൈൻ തീരത്തെ മുത്തുചിപ്പി ശേഖരണത്തെക്കുറിച്ചും അദ്ദേഹം കുറിച്ചുവെച്ചിട്ടുണ്ട്. മഗ്രിബി ലിപിയിൽ എഴുതപ്പെട്ട ഈ അപൂർവ്വ നിധി, ഇസ്ലാമിക ചരിത്രത്തിന്റെയും യാത്രാ വിവരണങ്ങളുടെയും പഠനത്തിൽ ഏറെ പ്രാധാന്യമർഹിക്കുന്ന ഒന്നാണ്. മുൻ വർഷങ്ങളിലും ഷേക്സ്പിയറിന്റെ ഫസ്റ്റ് ഫോളിയോ ഉൾപ്പെടെയുള്ള അപൂർവ്വ രചനകൾ പീറ്റർ ഹാരിംഗ്ടൺ യുഎഇയിലെ പുസ്തകോത്സവങ്ങളിൽ പ്രദർശിപ്പിച്ചിരുന്നു.