45
അബുദാബി : യുഎഇയിൽ പ്രതിരോധ മന്ത്രാലയത്തിന്റെ കീഴിൽ നടന്ന പരിശീലന ദൗത്യത്തിനിടെ രണ്ട് സൈനികർ കൊല്ലപ്പെട്ടു. മേജർ അബ്ദുള്ള ഷാമിസ് അൽമൻഹാലി, കാൻഡിഡേറ്റ് സഈദ് അബ്ദുള്ള അൽഷംസി എന്നിവരാണ് മരണപ്പെട്ടതെന്ന് യുഎഇ പ്രതിരോധ മന്ത്രാലയം ഔദ്യോഗികമായി സ്ഥിരീകരിച്ചു. രാജ്യത്തിനുള്ളിൽ വെച്ച് നടന്ന പരിശീലനത്തിനിടെയാണ് അപകടമുണ്ടായത്.
മരണപ്പെട്ട സൈനികരുടെ കുടുംബങ്ങളോട് പ്രതിരോധ മന്ത്രാലയം ആഴത്തിലുള്ള അനുശോചനവും സഹതാപവും രേഖപ്പെടുത്തി. വേർപാടിൽ പ്രയാസപ്പെടുന്ന കുടുംബങ്ങൾക്ക് ആശ്വാസവും കരുത്തും ലഭിക്കട്ടെയെന്ന് മന്ത്രാലയം പ്രാർത്ഥിച്ചു. ഈ വർഷം ജൂൺ 27-നും രാജ്യത്തിനുള്ളിൽ നടന്ന പരിശീലന ദൗത്യത്തിനിടെ ഫസ്റ്റ് കോർപ്പറൽ ഈസ ഗലൂം അൽ ബലൂഷി എന്ന സൈനികൻ മരണപ്പെട്ടിരുന്നു.