രണ്ടു മാസത്തെ ഇടിവിന് ശേഷം യുഎഇയിൽ നിന്നുള്ള പാകിസ്ഥാൻ പ്രവാസി പണമിടപാടിൽ വർദ്ധനവ്

ഇസ്ലാമാബാദ് : രണ്ടു മാസത്തെ തുടർച്ചയായ ഇടിവിന് ശേഷം യുഎഇയിൽ നിന്നുള്ള പാകിസ്ഥാൻ പ്രവാസികളുടെ പണമിടപാടിൽ (Remittances) ഓഗസ്റ്റിൽ നേരിയ വർദ്ധനവ്. സൗദി അറേബ്യയിൽ നിന്നുള്ള പണമിടപാടുകളിൽ കുറവ് രേഖപ്പെടുത്തിയെങ്കിലും, യുഎഇയിൽ നിന്നുള്ള തുക ഉയർന്നതാണ് ആകെ തുകയിൽ വർദ്ധനവുണ്ടാക്കിയത്. സ്റ്റേറ്റ് ബാങ്ക് ഓഫ് പാകിസ്ഥാൻ (SBP) പുറത്തുവിട്ട ഏറ്റവും പുതിയ കണക്കുകൾ പ്രകാരം ഓഗസ്റ്റിൽ ആകെ 3.656 ബില്യൺ ഡോളറാണ് പ്രവാസികൾ പാകിസ്ഥാനിലേക്ക് അയച്ചത്. ജൂലൈയിലെ 3.630 ബില്യൺ ഡോളറിനെ അപേക്ഷിച്ച് 0.71 ശതമാനം വർദ്ധനവാണിത്.
പാകിസ്ഥാന്റെ രണ്ടാമത്തെ വലിയ റെമിറ്റൻസ് സ്രോതസ്സായ യുഎഇയിൽ നിന്ന് ഓഗസ്റ്റിൽ 749.84 ദശലക്ഷം ഡോളർ ലഭിച്ചു (ജൂലൈയിൽ 737.31 ദശലക്ഷം). യുഎഇയിൽ നിന്ന് പ്രത്യേകിച്ച് ദുബായിൽ നിന്നുള്ള പണമിടപാടിലാണ് വലിയ കുതിച്ചുചാട്ടമുണ്ടായത് (10.27% വർദ്ധനവ്). എന്നാൽ അബുദാബി (-32.69%), ഷാർജ (-7.28%) എന്നിവിടങ്ങളിൽ നിന്നുള്ള തുകയിൽ ഇടിവ് രേഖപ്പെടുത്തി. പാകിസ്ഥാന്റെ ഏറ്റവും വലിയ പണമിടപാടു കേന്ദ്രമായ സൗദി അറേബ്യയിൽ നിന്നുള്ള അയക്കൽ 4.43 ശതമാനം ഇടിഞ്ഞ് 873.45 ദശലക്ഷം ഡോളറായി കുറഞ്ഞു.