അബുദാബി : ചൈനയിലെ പ്രമുഖ കോഫി റീട്ടെയിൽ ബ്രാൻഡായ ലക്കിൻ കോഫിയിൽ (Luckin Coffee) അബുദാബി പരമാധികാര നിക്ഷേപ ഫണ്ടായ മുബദാല (Mubadala Investment Company) 1 ബില്യൺ യുഎസ് ഡോളർ നിക്ഷേപിച്ചു. ലക്കിന്റെ പ്രൈവറ്റ് ഇക്വിറ്റി പങ്കാളിയായ സെഞ്ചൂറിയം ക്യാപിറ്റലുമായി (Centurium Capital) ചേർന്ന് ന്യൂനപക്ഷ ഓഹരികളാണ് മുബദാല സ്വന്തമാക്കിയത്. ചൈനയിൽ പാനീയ വിപണിയും കോഫി ഉപഭോഗവും അതിവേഗം വളരുന്ന സാഹചര്യത്തിലാണ് ഈ വൻ നിക്ഷേപം.
2017-ൽ പ്രവർത്തനം ആരംഭിച്ച ലക്കിൻ കോഫി ഡിജിറ്റൽ സാങ്കേതികവിദ്യയും വേഗമേറിയ ഡെലിവറി നെറ്റ്‌വർക്കും ഉപയോഗിച്ചാണ് വിപണി കീഴടക്കിയത്. 2026 ജൂൺ 30 വരെയുള്ള കണക്കുകൾ പ്രകാരം ആഗോളതലത്തിൽ 36,000-ത്തിലധികം ഔട്ട്‌ലെറ്റുകൾ പ്രവർത്തിപ്പിക്കുന്ന കമ്പനിക്ക് 500 ദശലക്ഷത്തോളം ഉപഭോക്താക്കളുണ്ട്. ചൈനീസ് ഉപഭോക്തൃ മേഖലയിലെ ദീർഘകാല സാധ്യതകൾ മുന്നിൽക്കണ്ടാണ് നിക്ഷേപമെന്ന് മുബദാല ഏഷ്യ പസഫിക് വിഭാഗം മേധാവി മുഹമ്മദ് അൽ ബദർ വ്യക്തമാക്കി.
21