എഡിഹെക്‌സിൽ വിന്റേജ് കാർ ശേഖരവുമായി ഷാർജ ക്ലബ്

അബുദാബി: അബുദാബി അന്താരാഷ്ട്ര വേട്ടയാടൽ, കുതിരപ്പന്തയ എക്‌സിബിഷനിൽ (ADIHEX 2026) വേറിട്ട കാഴ്ചയൊരുക്കി ഷാർജ ക്ലാസിക് കാർസ് ക്ലബ്ബിന്റെ അപൂർവ്വ വിന്റേജ് വാഹന ശേഖരം. 12 മില്യൺ ഡോളർ (ഏകദേശം 4.4 കോടി ദിർഹം) മതിപ്പുവിലയുള്ള 1935 മോഡൽ റോൾസ് റോയ്‌സ് ഫാന്റം II ആണ് പ്രദർശനത്തിലെ പ്രധാന ആകർഷണം. ലോകത്താകെ നിർമ്മിച്ച 37 കാറുകളിൽ 9 എണ്ണം മാത്രമാണ് നിലവിലുള്ളത്. ഫാക്ടറിയിൽ നിന്ന് പുറത്തിറങ്ങിയ ശേഷമുള്ള ഒറിജിനൽ അവസ്ഥയിൽ മാറ്റമില്ലാതെ സൂക്ഷിച്ചിരിക്കുന്നതിനാലാണ് ഈ റോൾസ് റോയ്‌സിന് വലിയ മൂല്യം കൽപ്പിക്കുന്നത്.
1949 മോഡൽ റൈലി RMC സ്പോർട്സ് കാറാണ് പ്രദർശനത്തിലെ മറ്റൊരു അപൂർവ്വ താരം. 3.5 മില്യൺ മുതൽ 5 മില്യൺ ഡോളർ വരെ മൂല്യം കണക്കാക്കുന്ന ഈ മോഡൽ നിലവിൽ രണ്ടെണ്ണം മാത്രമാണ് യുഎഇയിലുള്ളത്. ഇതുകൂടാതെ യുഎഇയുടെ രൂപീകരണത്തിന് മുൻപുള്ളതും ശേഷമുള്ളതുമായ പഴയകാല വാഹന നമ്പർ പ്ലേറ്റുകളുടെ വിപുലമായ ശേഖരവും ക്ലബ്ബ് ഇവിടെ ഒരുക്കിയിട്ടുണ്ട്. യുഎഇയുടെ മോട്ടോറിംഗ് ചരിത്രത്തിലേക്ക് വെളിച്ചം വീശുന്ന ഈ പ്രദർശനം സന്ദർശകർക്ക് പഴയകാല ആഡംബര വാഹന നിർമ്മാണ വൈദഗ്ധ്യത്തിന്റെ അവിസ്മരണീയമായ അനുഭവമാണ് സമ്മാനിക്കുന്നത്.