ദുബൈയിലെ പ്രശസ്തമായ ‘രാജു ഓംലെറ്റ്’ സ്ഥാപകൻ രാജീവ് മെഹ്രിഷ് അന്തരിച്ചു

ദുബൈ : ദുബൈയിലെ പ്രശസ്തമായ റെട്രോ-സ്റ്റൈൽ റസ്റ്റോറന്റ് ശൃംഖലയായ ‘രാജു ഓംലെറ്റിന്റെ’ (Raju Omlet) സ്ഥാപകനും സിഇഒയുമായ രാജീവ് മെഹ്രിഷ് (Rajiv Meherish) അന്തരിച്ചു. കുറച്ചു നാളുകളായി അസുഖബാധിതനായിരുന്ന അദ്ദേഹം ഞായറാഴ്ച രാവിലെയോടെയാണ് അന്തരിച്ചത്.
1980-ൽ ദുബൈയിലെത്തിയ മുംബൈ സർവ്വകലാശാലാ ബിരുദധാരിയായ രാജീവ്, പ്രമുഖ മാധ്യമങ്ങളിൽ സെയിൽസ് പ്രൊഫഷണലായാണ് കരിയർ ആരംഭിച്ചത്. പിന്നീട് വിപുലമായ മീഡിയ പബ്ലിഷിംഗ് രംഗത്തേക്ക് തിരിഞ്ഞ അദ്ദേഹം ദുബൈ മുനിസിപ്പാലിറ്റി, ദുബൈ എയർപോർട്ട് ഉൾപ്പെടെയുള്ള പ്രമുഖ സ്ഥാപനങ്ങൾക്ക് വേണ്ടിയും പ്രവർത്തിച്ചിട്ടുണ്ട്. തുടർന്ന് 2013-ലാണ് മുട്ട വിഭവങ്ങൾ കേന്ദ്രീകരിച്ച് ‘രാജു ഓംലെറ്റ്’ എന്ന വേറിട്ട ആശയം അദ്ദേഹം ആരംഭിക്കുന്നത്. ചുരുങ്ങിയ കാലം കൊണ്ട് ദുബൈയിലുടനീളം ഏഴോളം ഔട്ട്ലെറ്റുകളിലേക്ക് വളർന്ന ഈ ബ്രാൻഡിനെ ആഗോളതലത്തിൽ എത്തിക്കുക എന്നതായിരുന്നു അദ്ദേഹത്തിന്റെ ലക്ഷ്യം. രാജീവ് മെഹ്രിഷിന്റെ വേർപാടിൽ ദുബൈയിലെ പ്രമുഖ വ്യവസായികളും സാമൂഹിക പ്രവർത്തകരും അനുശോചനം രേഖപ്പെടുത്തി.