ദുബായ് : കാൻസർ രോഗികൾക്ക് കൈത്താങ്ങാകാൻ ഫണ്ട് ശേഖരണം ലക്ഷ്യമിട്ട് ദുബായിൽ നിന്നുള്ള 15 അംഗ സംഘം ബാർസിലോനയിൽ നിന്ന് പാരീസിലേക്ക് 3,333 കിലോമീറ്റർ നീളുന്ന സൈക്കിൾ യാത്ര ആരംഭിച്ചു. ദുബായ് അൽ ജലീല ഫൗണ്ടേഷന്റെ കാൻസർ കെയർ പദ്ധതികൾക്കായി ധനസമാഹരണം നടത്തുകയാണ് ‘സൈക്കിൾ എഗെയ്ൻസ്റ്റ് കാൻസർ’ എന്ന് പേരിട്ടിരിക്കുന്ന ഈ കൂട്ടായ്മയുടെ ലക്ഷ്യം. ദുബായ് സിവിൽ ഏവിയേഷൻ അതോറിറ്റി ചെയർമാനും എമിറേറ്റ്സ് ഗ്രൂപ്പ് ചീഫ് എക്സിക്യൂട്ടീവുമായ ഷെയ്ഖ് അഹമ്മദ് ബിൻ സയീദ് അൽ മക്തൂം യാത്ര പുറപ്പെടുന്നതിന് തൊട്ടുമുമ്പ് റൈഡർമാരുമായി കൂടിക്കാഴ്ച നടത്തി പിന്തുണ അറിയിച്ചിരുന്നു.
കാൻസർ രോഗത്തെ അതിജീവിച്ച 68-കാരനായ ഗൈഡോ ഡി വിൽഡെയുടെ നേതൃത്വത്തിലാണ് 25 ദിവസം നീളുന്ന ഈ കഠിനമായ യാത്ര സംഘടിപ്പിച്ചിരിക്കുന്നത്. യുഎഇയിലെ പ്രമുഖ വ്യവസായ പ്രമുഖരും കാൻസറിനെ നേരിട്ട് തോൽപ്പിച്ചവരും രോഗം മൂലം പ്രിയപ്പെട്ടവരെ നഷ്ടപ്പെട്ടവരും അടങ്ങുന്നതാണ് ഈ സംഘം. യാത്രയിലൂടെ ലഭിക്കുന്ന മുഴുവൻ തുകയും അൽ ജലീല ഫൗണ്ടേഷൻ വഴി സാമ്പത്തികമായി പിന്നോക്കം നിൽക്കുന്ന രോഗികളുടെ ചികിത്സയ്ക്കും കാൻസർ ഗവേഷണങ്ങൾക്കുമായി വിനിയോഗിക്കുമെന്ന് അധികൃതർ വ്യക്തമാക്കി.