ദുബായ് : കുട്ടികൾക്കായി ഡൈവിങ്, പ്രഥമശുശ്രൂഷ, സൈബർ സുരക്ഷ എന്നിവയുൾപ്പെടെയുള്ള വിപുലമായ പരിശീലന പരിപാടികളുമായി ദുബായ് പൊലീസിന്റെ വാർഷിക സമ്മർ ക്യാമ്പ് ആരംഭിച്ചു. ദുബായിലും ഹത്തയിലുമുള്ള 8 കേന്ദ്രങ്ങളിലായി നടക്കുന്ന ഈ ക്യാമ്പിൽ 31 രാജ്യങ്ങളിൽ നിന്നുള്ള 1,400 വിദ്യാർത്ഥികളാണ് പങ്കെടുക്കുന്നത്. കായിക പരിശീലനത്തിന് പുറമെ ഓൺലൈൻ ഗെയിമുകളിലെ അപകടങ്ങളെക്കുറിച്ചും സൈബർ സുരക്ഷയെക്കുറിച്ചുമുള്ള ബോധവൽക്കരണവും ഇത്തവണത്തെ ക്യാമ്പിന്റെ പ്രധാന ആകർഷണമാണ്.
ആദ്യമായി ഉൾപ്പെടുത്തിയ ‘ലിറ്റിൽ പാരാമെഡിക്’ കോഴ്സിലൂടെ കുട്ടികൾക്ക് പ്രഥമശുശ്രൂഷയിൽ നേരിട്ട് പരിശീലനം നൽകും. കൂടാതെ, 14 വയസ്സിന് മുകളിലുള്ള കുട്ടികൾക്കായി അന്താരാഷ്ട്ര അംഗീകാരമുള്ള പാഡി (PADI) സർട്ടിഫിക്കറ്റോട് കൂടിയ ഓപ്പൺ വാട്ടർ ഡൈവിങ് കോഴ്സും ക്രിമിനൽ ഇൻവെസ്റ്റിഗേഷൻ വിഭാഗം നയിക്കുന്ന ‘കോൺഷ്യസ് ഡിറ്റക്റ്റീവ്’ കോഴ്സും ഇതിന്റെ ഭാഗമായി ഒരുക്കിയിട്ടുണ്ട്. കുട്ടികളിൽ അച്ചടക്കവും നിയമബോധവും വളർത്തിയെടുക്കാൻ ലക്ഷ്യമിടുന്ന ഈ ക്യാമ്പിനായി ഇത്തവണ 1.45 ലക്ഷത്തിലധികം അപേക്ഷകരാണ് രജിസ്റ്റർ ചെയ്തതെന്ന് ദുബായ് പൊലീസ് അധികൃതർ വ്യക്തമാക്കി.