യുഎഇയിൽ വേനലിലും വസന്തം തീർത്ത് ഫ്ലേം ട്രീകൾ; ക്യാമറക്കണ്ണുകളിൽ നിറഞ്ഞ് ദുബായ്

ദുബായ് : കടുത്ത വേനൽച്ചൂടിലേക്ക് ദുബായ് കടക്കുമ്പോൾ നഗരവീഥികളിലും പാർക്കുകളിലും വസന്തത്തിന്റെ അഗ്നിപ്പൂക്കൾ വിരിയിക്കുകയാണ് ‘ഫ്ലേം ട്രീ’കൾ (Flame Trees). ഇതിനകം അൻപതിനായിരത്തിലധികം ഫ്ലേം ട്രീകളാണ് ദുബായിൽ ഉടനീളം നട്ടുപിടിപ്പിച്ചിട്ടുള്ളത്. വേനൽക്കാലത്ത് ദുബായിലെ തെരുവുകൾക്ക് തണലും മനോഹരമായ ഓറഞ്ച്-ചുവപ്പ് നിറവും സമ്മാനിക്കുന്ന ഈ മരങ്ങൾ നഗരത്തിന്റെ സാംസ്കാരിക അടയാളമായി മാറിക്കഴിഞ്ഞു.
ദുബായ് കിരീടാവകാശി ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തുമിന്റെ നിർദ്ദേശപ്രകാരം നഗരത്തിലെങ്ങും ഇതിന്റെ സാന്നിധ്യം വിപുലമാക്കിയിട്ടുണ്ട്. താമസക്കാർക്ക് തൈകൾ നട്ടുപിടിപ്പിക്കാനായി ദുബായ് മുനിസിപ്പാലിറ്റി വഴി ഇവ വിതരണം ചെയ്യുന്നുമുണ്ട്. ഏകദേശം 12 മീറ്റർ വരെ ഉയരത്തിൽ വളരുന്ന ഈ മരങ്ങൾ വലിയ തണൽക്കുട രൂപപ്പെടുത്തുകയും, ഇതിന് താഴെയുള്ള താപനില 5 ഡിഗ്രി സെൽഷ്യസ് വരെ കുറയ്ക്കാൻ സഹായിക്കുകയും ചെയ്യും. മേയ് 1 മുതൽ ജൂലൈ 31 വരെയാണ് വാർഷിക ‘ഫ്ലേം ട്രീ സീസൺ’ ആയി ദുബായിൽ ആഘോഷിക്കുന്നത്.