ദുബായ് : യുഎഇയിൽ വരും ദിവസങ്ങളിൽ ചൂട് വർദ്ധിക്കുമെന്നും ഒപ്പം ശക്തമായ പൊടിക്കാറ്റിനും രാത്രികാലങ്ങളിൽ അന്തരീക്ഷ ഈർപ്പം ഉയരുന്നതിനെ തുടർന്ന് ചില തീരദേശ മേഖലകളിൽ മൂടൽമഞ്ഞിനും സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു. രാജ്യത്ത് പൊതുവെ തെളിഞ്ഞ കാലാവസ്ഥയായിരിക്കുമെങ്കിലും കിഴക്കൻ മേഖലകളിൽ താഴ്ന്ന മേഘങ്ങൾ പ്രത്യക്ഷപ്പെടാൻ സാധ്യതയുണ്ട്. പകൽ സമയങ്ങളിൽ വീശിയടിക്കുന്ന കാറ്റ് ശക്തമാകുന്നതോടെ തുറസ്സായ സ്ഥലങ്ങളിൽ പൊടിയും മണലും ഉയരുന്നതിനും കാഴ്ചപരിധി കുറയുന്നതിനും കാരണമാകും.
വരും ദിവസങ്ങളിൽ ഉൾപ്രദേശങ്ങളിൽ താപനില 39 ഡിഗ്രി മുതൽ 46 ഡിഗ്രി സെൽഷ്യസ് വരെയും തീരദേശങ്ങളിലും ദ്വീപുകളിലും 36 ഡിഗ്രി മുതൽ 41 ഡിഗ്രി സെൽഷ്യസ് വരെയും ഉയർന്നേക്കാം. പർവത മേഖലകളിൽ 32 ഡിഗ്രി മുതൽ 37 ഡിഗ്രി സെൽഷ്യസ് വരെയായിരിക്കും ചൂട് രേഖപ്പെടുത്തുക.
രാത്രികാലങ്ങളിൽ അന്തരീക്ഷ ഈർപ്പം 90 ശതമാനം വരെ ഉയരാൻ സാധ്യതയുള്ളതിനാൽ പുലർച്ചെ സമയങ്ങളിൽ കനത്ത മൂടൽമഞ്ഞിന് സാധ്യതയുണ്ട്. തിങ്കൾ, ചൊവ്വാ ദിവസങ്ങളിലും വടക്കുപടിഞ്ഞാറൻ കാറ്റ് സജീവമാകാൻ സാധ്യതയുള്ളതിനാൽ ഡ്രൈവർമാർ ജാഗ്രത പാലിക്കണം. അറേബ്യൻ ഗൾഫിൽ കടൽാവസ്ഥ തുടക്കത്തിൽ ശാന്തമായിരിക്കുമെങ്കിലും തിങ്കളാഴ്ച രാത്രിയോടെ പ്രക്ഷുബ്ധമാകാൻ സാധ്യതയുണ്ടെന്നും ഒമാൻ കടൽ പൊതുവെ ശാന്തമായിരിക്കുമെന്നും കാലാവസ്ഥാ കേന്ദ്രം വ്യക്തമാക്കി.