അറഫാ ദിനത്തിൽ കാരുണ്യഹസ്തവുമായി ഷാർജ ചാരിറ്റി; 15,000 ഇഫ്താർ ഭോജനങ്ങൾ വിതരണം ചെയ്തു

ഷാർജ: പുണ്യങ്ങളുടെ അറഫാ ദിനത്തിൽ നിർധനരായ കുടുംബങ്ങൾക്കും തൊഴിലാളികൾക്കും വലിയ രീതിയിലുള്ള മാനുഷിക സഹായവുമായി ഷാർജ ചാരിറ്റി ഇന്റർനാഷണൽ രംഗത്ത്. ചൊവ്വാഴ്ച സൂര്യാസ്തമയ സമയത്ത് ഷാർജയിലെ വിവിധ ഭാഗങ്ങളിലായി 15,000 ഇഫ്താർ ഭക്ഷണപ്പൊതികളാണ് സംഘടന വിതരണം ചെയ്തത്. ദുൽഹിജ്ജ മാസത്തിലെ ആദ്യ പത്ത് ദിവസങ്ങളിൽ ദുർബലവിഭാഗങ്ങളെ പിന്തുണയ്ക്കുന്നതിനും ഇസ്‌ലാമിക കലണ്ടറിലെ ഏറ്റവും പവിത്രമായ ഈ വേളയിൽ പരസ്പര ഐക്യദാർഢ്യത്തിന്റെ സന്ദേശം പ്രചരിപ്പിക്കുന്നതിനുമായി ഷാർജ ചാരിറ്റി ആരംഭിച്ച ‘അറഫാ ദിന ഭക്ഷണ പദ്ധതി’ (Day of Arafah Meals) എന്ന സീസണൽ കാരുണ്യ സംരംഭത്തിന്റെ ഭാഗമായാണ് ഈ വിതരണം നടന്നത്. ഈ പുണ്യദിനത്തിന്റെ അനുഗ്രഹങ്ങളും സന്തോഷവും അർഹരായ തൊഴിലാളികളിലേക്കും കുടുംബങ്ങളിലേക്കും എത്തിക്കാനുള്ള സംഘടനയുടെ നിരന്തരമായ പ്രതിബദ്ധതയുടെ ഭാഗമായാണ് ഈ പ്രവർത്തനമെന്ന് അസോസിയേഷൻ എക്സിക്യൂട്ടീവ് ഡയറക്ടർ അബ്ദുള്ള സുൽത്താൻ ബിൻ ഖാദിം വ്യക്തമാക്കി.