ദുബായ് : യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂമിന്റെ നിർദ്ദേശപ്രകാരം ദുബായിലെ സ്വകാര്യ മേഖലയിൽ പുതിയൊരു മാറ്റത്തിന് തുടക്കമിടുന്നു. സ്വയം പ്രവർത്തിക്കാനും തീരുമാനങ്ങൾ എടുക്കാനും കഴിവുള്ള ആർട്ടിഫിഷ്യൽ ഇന്റലിജൻസ് (Agentic AI) സാങ്കേതികവിദ്യ ബിസിനസ് മേഖലയിൽ നടപ്പിലാക്കുന്നതിനുള്ള പദ്ധതി ദുബായ് കിരീടാവകാശി ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം പ്രഖ്യാപിച്ചു. ഈ നൂതന സാങ്കേതികവിദ്യകൾ സാമ്പത്തിക-വാണിജ്യ മേഖലകളിൽ നടപ്പിലാക്കുന്ന ലോകത്തിലെ ഏറ്റവും മികച്ച നഗരമായി ദുബായിയെ മാറ്റുകയാണ് ഇതിലൂടെ ലക്ഷ്യമിടുന്നത്.
രണ്ട് വർഷം നീണ്ടുനിൽക്കുന്ന ഈ പരിവർത്തന പരിപാടിയിൽ ദുബായ് ചേമ്പർ ഓഫ് കൊമേഴ്‌സിന് കീഴിലുള്ള എല്ലാ ബിസിനസ് കൗൺസിലുകൾക്കും പ്രത്യേക പരിശീലന പാതകൾ ഒരുക്കിയിട്ടുണ്ട്. ഇതിന്റെ ഭാഗമായി ‘ഏജന്റിക് എഐ’ കമ്പനികൾക്കായി പ്രത്യേക ഇൻകുബേറ്ററുകൾ സ്ഥാപിക്കാനും ഈ മേഖലയിലെ മാറ്റങ്ങളെ പിന്തുണയ്ക്കാനും ദുബായ് ചേമ്പറിന് നിർദ്ദേശം നൽകി. യുവാക്കൾക്ക് ഈ രംഗത്ത് പുതിയ സാമ്പത്തിക അവസരങ്ങൾ സൃഷ്ടിക്കുന്നതിനൊപ്പം, ഈ മാറ്റങ്ങളെ സാമ്പത്തികമായി സഹായിക്കുന്നതിനായി പ്രത്യേക ഫണ്ടുകൾ രൂപീകരിക്കാനും തീരുമാനമായിട്ടുണ്ട്.
കമ്പനികളുടെ ഉൽപ്പാദനക്ഷമത വർദ്ധിപ്പിക്കാനും ബിസിനസ് വ്യാപിപ്പിക്കാനും ഈ സാങ്കേതികവിദ്യകൾ സഹായിക്കും. ദുബായിയെ ലോകത്തിലെ ഏറ്റവും ഭാവി സജ്ജമായ (Future-ready) നഗരമാക്കി മാറ്റുന്നതിനുള്ള ഷെയ്ഖ് മുഹമ്മദ് ബിൻ റാഷിദിന്റെ വലിയ കാഴ്ചപ്പാടിന്റെ ഭാഗമാണിത്. സാങ്കേതികവിദ്യ, സമ്പദ്‌വ്യവസ്ഥ, അടിസ്ഥാന സൗകര്യങ്ങൾ എന്നിവയിൽ ലോകം ഇതുവരെ കാണാത്ത ഉയർന്ന നിലവാരം കൈവരിക്കാനും ജനങ്ങളുടെ ജീവിതനിലവാരം മെച്ചപ്പെടുത്താനും ഈ പദ്ധതിയിലൂടെ ദുബായ് ലക്ഷ്യമിടുന്നു.