ദുബായ് : യുഎഇ സായുധ സേനയുടെ ഏകീകരണത്തിന്റെ അമ്പതാം വാർഷിക വേളയിൽ രാജ്യത്തെ ഭരണാധികാരികൾക്കും ജനങ്ങൾക്കും ഹൃദയം നിറഞ്ഞ ആശംസകൾ നേർന്ന് ദുബായ് കിരീടാവകാശി ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം. യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ, യുഎഇ വൈസ് പ്രസിഡന്റും പ്രധാനമന്ത്രിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം, മറ്റ് എമിറേറ്റുകളിലെ ഭരണാധികാരികൾ എന്നിവർക്ക് അദ്ദേഹം തന്റെ എക്സ് (X) പ്ലാറ്റ്‌ഫോമിലൂടെ പ്രത്യേകമായി അഭിനന്ദനങ്ങൾ അറിയിച്ചു.
മഹത്തായ ഈ ചരിത്ര മുഹൂർത്തത്തെ വലിയ അഭിമാനത്തോടെയാണ് രാജ്യം കാണുന്നതെന്ന് ഷെയ്ഖ് ഹംദാൻ പറഞ്ഞു. യുഎഇ സായുധ സേന എന്നും രാജ്യത്തിന്റെ കരുത്തുറ്റ കവചമായി നിലകൊള്ളുന്നു. രാജ്യത്തിന്റെ പരമാധികാരം സംരക്ഷിക്കുന്നതിനും ഇക്കാലമത്രയും കൈവരിച്ച നേട്ടങ്ങൾ കാത്തുസൂക്ഷിക്കുന്നതിനും സായുധ സേന വഹിക്കുന്ന പങ്ക് സമാനതകളില്ലാത്തതാണ്. നമ്മുടെ ഭാവി സ്വപ്നങ്ങളിലേക്ക് ആത്മവിശ്വാസത്തോടെ മുന്നേറാൻ സായുധ സേന നൽകുന്ന സുരക്ഷയും കരുത്തും വലിയ ഊർജ്ജമാണെന്നും അദ്ദേഹം കൂട്ടിച്ചേർത്തു.