അബുദാബി : അബുദാബിയിലെ ആദ്യ സമ്പൂർണ്ണ സൗരോർജ്ജ കമ്മ്യൂണിറ്റി തുറമുഖമായ ‘അൽ ദന്ന കമ്മ്യൂണിറ്റി ഹാർബർ’ അൽ ദഫ്ര മേഖലയിൽ തുറന്നു. അബുദാബി മൊബിലിറ്റി, എഡി പോർട്ട്സ് ഗ്രൂപ്പ്, അബുദാബി മാരിടൈം എന്നിവ ചേർന്ന് നവീകരിച്ച ഈ തുറമുഖം ഷെയ്ഖ് ഹംദാൻ ബിൻ സായിദ് അൽ നഹ്യാൻ ഉദ്ഘാടനം ചെയ്തു. ദൽമ ഐലൻഡ് റൂട്ടിലെ യാത്ര സുഗമമാക്കുന്ന അത്യാധുനിക ഫെറി ടെർമിനൽ, 16 ബർത്തുകളുള്ള മറീന, ബോട്ട് വർക്ക്‌ഷോപ്പുകൾ, റെസ്റ്റോറന്റ്, കളിസ്ഥലം എന്നിവയും കാറുകൾക്കും ആർവികൾക്കുമായി വിപുലമായ പാർക്കിംഗ് സൗകര്യങ്ങളും ഇവിടെ ഒരുക്കിയിട്ടുണ്ട്.
പരിസ്ഥിതി സൗഹൃദമായ ഈ പദ്ധതിക്ക് ആവശ്യമായ ഊർജ്ജത്തിന്റെ 80 ശതമാനവും സോളാർ പാനലുകളിൽ നിന്നാണ് ലഭിക്കുന്നത്. ഫെറികൾ നിർത്തിയിടുമ്പോൾ എഞ്ചിൻ പ്രവർത്തിപ്പിക്കാതെ വൈദ്യുതി നൽകാനുള്ള സൗകര്യവും 14 ഇലക്ട്രിക് വാഹന ചാർജിംഗ് പോയിന്റുകളും വഴി പ്രതിവർഷം 500 ടൺ കാർബൺ പുറന്തള്ളൽ കുറയ്ക്കാൻ സാധിക്കും. പ്രാദേശിക മരങ്ങൾ സംരക്ഷിച്ചുകൊണ്ട് വികസിപ്പിച്ച ഈ തുറമുഖം, മേഖലയിലെ വിനോദസഞ്ചാരത്തിനും സുസ്ഥിര വികസനത്തിനും പുതിയ കരുത്തേകും.