മനാമ : പ്രവാസികൾക്കും സാമ്പത്തിക വിപണിക്കും ആവേശം നൽകിക്കൊണ്ട് ബഹ്റൈൻ ദിനാർ ഇന്ത്യൻ രൂപയ്‌ക്കെതിരെ വലിയ മുന്നേറ്റം നടത്തുന്നു. 2026 മെയ് ആദ്യവാരത്തിലെ കണക്കുകൾ പ്രകാരം ഒരു ബഹ്റൈൻ ദിനാറിന് 251 മുതൽ 252 ഇന്ത്യൻ രൂപ വരെയാണ് വിനിമയ നിരക്ക് രേഖപ്പെടുത്തുന്നത്. ചരിത്രത്തിലെ തന്നെ ഏറ്റവും ഉയർന്ന നിരക്കുകളിലൊന്നിലേക്കാണ് ദിനാർ ഇപ്പോൾ എത്തിനിൽക്കുന്നത്. ഇത് ബഹ്‌റൈനിലുള്ള ഇന്ത്യൻ പ്രവാസികൾക്ക് നാട്ടിലേക്ക് പണമയക്കുമ്പോൾ കൂടുതൽ നേട്ടം നൽകുന്നു.
ഇന്ത്യൻ രൂപയുടെ മൂല്യം അന്താരാഷ്ട്ര വിപണിയിൽ വൻതോതിൽ ഇടിഞ്ഞതാണ് ഈ മാറ്റത്തിന് പ്രധാന കാരണം. അമേരിക്കൻ ഡോളറിനെതിരെ രൂപയുടെ മൂല്യം 95 എന്ന റെക്കോർഡ് തകർച്ചയിലേക്ക് പോയിരിക്കുകയാണ്. ആഗോളതലത്തിലുള്ള സാമ്പത്തിക സമ്മർദ്ദങ്ങളും ഇന്ധന ഇറക്കുമതിക്കായി ഇന്ത്യക്ക് വലിയ തുക ചിലവാക്കേണ്ടി വരുന്നതുമാണ് രൂപയ്ക്ക് തിരിച്ചടിയായത്. ഡോളറുമായി സ്ഥിരമായ വിനിമയ നിരക്ക് നിലനിർത്തുന്ന കറൻസിയായതിനാൽ, ഡോളർ കരുത്താർജിച്ചതോടെ ബഹ്റൈൻ ദിനാറിൻ്റെ മൂല്യവും രൂപയ്‌ക്കെതിരെ സ്വാഭാവികമായി വർധിക്കുകയായിരുന്നു.