ദുബൈ : ഇസ്ലാമിക കലകളുടെ പ്രമുഖ സാംസ്കാരിക ആഘോഷമായ ‘അൽ ബുർദ അവാർഡിന്റെ’ (Al Burda Award) ഇരുപതാം പതിപ്പിന്റെ പ്രധാന വിവരങ്ങൾ യുഎഇ സാംസ്കാരിക മന്ത്രാലയം പ്രഖ്യാപിച്ചു. അബുദാബിയിലെ മന്ത്രാലയ ആസ്ഥാനത്ത് നടന്ന മാധ്യമ സമ്മേളനത്തിലാണ് സാംസ്കാരിക രംഗത്തെ പ്രമുഖരുടെയും ഉദ്യോഗസ്ഥരുടെയും സാന്നിധ്യത്തിൽ വിവരങ്ങൾ പുറത്തുവിട്ടത്. യുഎഇ ഉപപ്രധാനമന്ത്രിയും വിദേശകാര്യ മന്ത്രിയുമായ ഷെയ്ഖ് അബ്ദുള്ള ബിൻ സായിദ് അൽ നഹ്യാന്റെ രക്ഷാകർതൃത്വത്തിൽ 2004-ൽ ആരംഭിച്ച ഈ പുരസ്കാരം, ഇത്തവണ ‘കുടുംബ വർഷത്തോട്’ (Year of the Family) അനുബന്ധിച്ചാണ് നടക്കുന്നത്.
കഴിഞ്ഞ 19 പതിപ്പുകളിലായി ലോകമെമ്പാടുമുള്ള 420-ലധികം പ്രതിഭകളെ അൽ ബുർദ അവാർഡ് ആദരിച്ചിട്ടുണ്ടെന്ന് സാംസ്കാരിക മന്ത്രാലയ അസിസ്റ്റന്റ് അണ്ടർസെക്രട്ടറി ഷദ അൽ മുല്ല വ്യക്തമാക്കി. അറബിക് കവിത, അറബിക് കാലിഗ്രാഫി, ഓർണമെന്റേഷൻ (അലങ്കാരപ്പണികൾ) എന്നിങ്ങനെ മൂന്ന് പ്രധാന വിഭാഗങ്ങളിലാണ് ഇത്തവണ അവാർഡുകൾ നൽകുന്നത്. ക്ലാസിക്കൽ, നബാത്തി കവിതകൾ, പരമ്പരാഗതവും സമകാലികവുമായ കാലിഗ്രാഫി ഡിസൈനുകൾ തുടങ്ങി വിവിധ ഉപവിഭാഗങ്ങളും ഇതിൽ ഉൾപ്പെടുന്നു. ഇസ്ലാമിക കലകളുടെ മൗലികത നിലനിർത്തിക്കൊണ്ട് പുതിയ സർഗ്ഗാത്മക പരീക്ഷണങ്ങൾക്ക് വഴിതുറക്കുന്ന മാറ്റങ്ങളാണ് ഇരുപതാം പതിപ്പിൽ ഒരുക്കിയിരിക്കുന്നതെന്നും അധികൃതർ അറിയിച്ചു.