സ്വപ്നം കാണാൻ പഠിപ്പിച്ച നേതാവ്; ഷെയ്ഖ് മുഹമ്മദിന്റെ ജന്മദിനത്തിൽ തലമുറകളെ സ്വാധീനിച്ച ആ വാക്കുകൾ വീണ്ടും ചർച്ചയാകുന്നു

ദുബായ് : യുഎഇയുടെ ഭരണാധികാരിയായ ഹിസ് ഹൈനസ് ഷെയ്ഖ് മുഹമ്മദ് ബിൻ റാഷിദ് അൽ മക്തുമിന്റെ 77-ാം ജന്മദിനത്തിൽ, അത്യപൂർവ്വമായ അദ്ദേഹത്തിന്റെ ഭരണനേട്ടങ്ങൾക്കൊപ്പം തന്നെ ലോകമെമ്പാടുമുള്ള ലക്ഷക്കണക്കിന് ആളുകളെ സ്വാധീനിച്ച അദ്ദേഹത്തിന്റെ വാക്കുകളും രാജ്യം നെഞ്ചോട് ചേർക്കുകയാണ്. ആകാശമാണ് അതിരുകളെന്ന് പറയുന്നവർക്ക് മുന്നിൽ ആകാശം വെറുമൊരു തുടക്കം മാത്രമാണെന്ന് തെളിയിച്ച അദ്ദേഹം, ‘അസാധ്യം’ എന്ന വാക്ക് യുഎഇയുടെ നിഘണ്ടുവിലില്ലെന്ന ദർശനമാണ് ജനങ്ങൾക്ക് പകർന്നു നൽകിയത്. റെക്കോർഡുകൾ ഭേദിച്ച നിർമ്മിതികൾ മുതൽ ബഹിരാകാശ ഗവേഷണങ്ങളിലും ആർട്ടിഫിഷ്യൽ ഇന്റലിജൻസിലും രാജ്യം കൈവരിച്ച മുന്നേറ്റങ്ങൾ ഈ തത്വശാസ്ത്രത്തിന്റെ പ്രതിഫലനമാണ്. ഭയത്തിലൂടെയല്ല, മറിച്ച് വലിയ സ്വപ്നങ്ങളിലൂടെയും കഠിനാധ്വാനത്തിലൂടെയും മുന്നേറാൻ പഠിപ്പിച്ച അദ്ദേഹത്തിന്റെ വാക്കുകൾ ഇന്ന് യുഎഇയിലെ വിദ്യാലയങ്ങളിലും ഓഫീസുകളിലും സമൂഹമാധ്യമങ്ങളിലും ഒരു ജനതയുടെ വിജയമന്ത്രമായി മുഴങ്ങിക്കേൾക്കുന്നു.