ദുബായ് : 2025-ൽ യുഎഇയിലെ പ്രൈമറി ഹെൽത്ത് കെയർ സെന്ററുകളിൽ രജിസ്റ്റർ ചെയ്ത പ്രമേഹരോഗികളിൽ പുരുഷന്മാരേക്കാൾ കൂടുതൽ സ്ത്രീകളാണെന്ന് എമിറേറ്റ്സ് ഹെൽത്ത് സർവീസസ് വെളിപ്പെടുത്തി. വിട്ടുമാറാത്ത രോഗങ്ങളുടെ മാനേജ്‌മെന്റ് ശക്തിപ്പെടുത്തുന്നതിനും ചികിത്സാ സൗകര്യങ്ങൾ വിപുലീകരിക്കുന്നതിനുമുള്ള രാജ്യത്തിന്റെ ശ്രമങ്ങൾക്കിടയിലാണ് ഈ പുതിയ വിവരങ്ങൾ പുറത്തുവന്നിരിക്കുന്നത്. കഴിഞ്ഞ വർഷം ഇ.എച്ച്.എസ് കേന്ദ്രങ്ങളിൽ ആകെ രജിസ്റ്റർ ചെയ്ത 20,713 രോഗികളിൽ 12,349 പേർ സ്ത്രീകളും 8,364 പേർ പുരുഷന്മാരുമാണ്. രോഗബാധിതരിൽ ഭൂരിഭാഗവും യുഎഇ പൗരന്മാരാണെന്നതും ശ്രദ്ധേയമാണ്. 15,407 സ്വദേശികളും 5,306 വിദേശികളുമാണ് ചികിത്സ തേടിയത്. കൃത്യമായ പരിശോധനകളിലൂടെ രോഗം നേരത്തെ കണ്ടെത്തേണ്ടതിന്റെ ആവശ്യകതയാണ് ഈ കണക്കുകൾ വിരൽചൂണ്ടുന്നത്.
വിവിധ എമിറേറ്റുകളിലെ കണക്കുകൾ പരിശോധിക്കുമ്പോൾ ഷാർജയിലാണ് ഏറ്റവും കൂടുതൽ പ്രമേഹരോഗികൾ ഉള്ളത്. ഇവിടെ 8,153 കേസുകൾ റിപ്പോർട്ട് ചെയ്തു. തൊട്ടുപിന്നാലെ റാസൽഖൈമയിൽ 5,283 പേരും ഫുജൈറയിൽ 3,779 പേരും ചികിത്സയിലുണ്ട്. അജ്മാനിൽ 1,264 പേരും ഉമ്മുൽഖുവൈനിൽ 1,130 പേരും രജിസ്റ്റർ ചെയ്തപ്പോൾ ദുബായിൽ രോഗികളുടെ എണ്ണം 1,104 ആണ്. ദുബായിലെ രോഗികളിൽ 581 സ്ത്രീകളും 523 പുരുഷന്മാരും ഉൾപ്പെടുന്നു. അത്യാധുനിക മെഡിക്കൽ സാങ്കേതികവിദ്യകൾ ഉപയോഗപ്പെടുത്തി രോഗികളുടെ ജീവിതനിലവാരം മെച്ചപ്പെടുത്തുന്നതിനും രോഗം മൂലമുണ്ടാകുന്ന സങ്കീർണ്ണതകൾ കുറയ്ക്കുന്നതിനുമുള്ള പ്രവർത്തനങ്ങൾ എമിറേറ്റ്സ് ഹെൽത്ത് സർവീസസ് ഊർജിതമാക്കിയിട്ടുണ്ട്.
മികച്ച പ്രമേഹ ചികിത്സാ സേവനങ്ങൾ നൽകുന്നതിന് അന്താരാഷ്ട്ര തലത്തിലുള്ള ജോയിന്റ് കമ്മീഷൻ ഇന്റർനാഷണൽ (JCI) അംഗീകാരം ഇ.എച്ച്.എസ് നേടിയിട്ടുണ്ട്. ദുബായിലും നോർത്തേൺ എമിറേറ്റുകളിലുമായി വ്യാപിച്ചുകിടക്കുന്ന 12 ആശുപത്രികൾക്കും 8 ഹെൽത്ത് കെയർ സെന്ററുകൾക്കുമാണ് ഈ അംഗീകാരം ലഭിച്ചത്. ഇതോടെ ലോകത്തിലെ ഏറ്റവും വലിയ അംഗീകൃത പ്രമേഹ പരിചരണ ശൃംഖലയായി ഇത് മാറി. കൂടാതെ, സ്വാഭാവിക പാൻക്രിയാസിന്റെ പ്രവർത്തനം അനുകരിക്കുന്ന ആർട്ടിഫിഷ്യൽ ഇന്റലിജൻസ് അധിഷ്ഠിത ഇൻസുലിൻ പമ്പുകൾ (ഉദാഹരണത്തിന് MinimedTM 780G) ഉൾപ്പെടെയുള്ള അത്യാധുനിക സംവിധാനങ്ങൾ രോഗികൾക്ക് ലഭ്യമാക്കുന്നുണ്ട്. ഇത് രക്തത്തിലെ പഞ്ചസാരയുടെ അളവ് കൃത്യമായി നിലനിർത്താനും രോഗികളുടെ സുരക്ഷ ഉറപ്പാക്കാനും സഹായിക്കുന്നു.