അബുദാബി : യുഎഇയിൽ പരിശീലന ദൗത്യത്തിനിടെ വീരമൃത്യു വരിച്ച രണ്ട് യുഎഇ സൈനികർക്കും ഔദ്യോഗിക മിലിട്ടറി സംസ്കാരച്ചടങ്ങുകൾ നടന്നു. അബുദാബിയിലെ സായിദ് മിലിട്ടറി ഹോസ്പിറ്റലിൽ തിങ്കളാഴ്ചയാണ് ചടങ്ങുകൾ നടന്നത്. 2026 സെപ്റ്റംബർ 14-ന് നടന്ന പരിശീലനത്തിനിടെ മരണപ്പെട്ട മേജർ അബ്ദുള്ള ഷാമിസ് അൽ മൻഹാലി, ഓഫീസർ കേഡറ്റ് സഈദ് അബ്ദുള്ള അൽ ഷംസി എന്നിവരുടെ ഭൗതികശരീരങ്ങളാണ് ഔദ്യോഗിക ബഹുമതികളോടെ സംസ്കരിച്ചത്.
യുഎഇ പ്രതിരോധ മന്ത്രാലയത്തിലെ ഉന്നത ഉദ്യോഗസ്ഥരും കമാൻഡർമാരും വീരമൃത്യു വരിച്ച സൈനികരുടെ കുടുംബാംഗങ്ങളും ബന്ധുക്കളും ചടങ്ങിൽ പങ്കെടുത്തു. മരണപ്പെട്ട സൈനികരുടെ കുടുംബങ്ങളോട് പ്രതിരോധ മന്ത്രാലയം വീണ്ടും ആഴത്തിലുള്ള അനുശോചനവും സഹതാപവും രേഖപ്പെടുത്തി. വേർപാടിൽ പ്രയാസപ്പെടുന്ന കുടുംബങ്ങൾക്ക് വിയോഗം താങ്ങാനുള്ള കരുത്ത് നൽകട്ടെയെന്ന് മന്ത്രാലയം പ്രാർത്ഥിച്ചു.
