അബുദാബി : യുഎഇയുടെ ദേശീയ വിമാനക്കമ്പനിയായ എത്തിഹാദ് എയർവേയ്‌സും (Etihad Airways) എത്തിഹാദ് റെയിലും (Etihad Rail) സംയോജിത വിമാന-ട്രെയിൻ യാത്രാ സൗകര്യങ്ങൾ ഒരുക്കുന്നതിനായി ധാരണയിലെത്തി. അബുദാബിയിലെ സായിദ് അന്താരാഷ്ട്ര വിമാനത്താവളത്തെ ദേശീയ റെയിൽ ശൃംഖലയുമായി ബന്ധിപ്പിക്കുന്നതിനായി മുഹമ്മദ് ബിൻ സായിദ് സിറ്റി പാസഞ്ചർ സ്റ്റേഷനിലേക്ക് പ്രത്യേക ഷട്ടിൽ സർവീസുകൾ ആരംഭിക്കുന്നത് ഉൾപ്പെടെയുള്ള പദ്ധതികളാണ് പഠനവിധേയമാക്കുന്നത്. അറേബ്യൻ ട്രാവൽ മാർക്കറ്റിൽ വെച്ചാണ് ഇരു സ്ഥാപനങ്ങളും ധാരണാപത്രത്തിൽ ഒപ്പുവെച്ചത്.
പുതിയ പങ്കാളിത്തം വഴി അന്താരാഷ്ട്ര സഞ്ചാരികൾക്ക് അബുദാബിയിൽ വിമാനമിറങ്ങി യുഎഇയിലെ മറ്റ് എമിറേറ്റുകളിലേക്ക് ട്രെയിൻ വഴി എളുപ്പത്തിൽ യാത്ര ചെയ്യാനുള്ള സൗകര്യമൊരുങ്ങും. സിംഗിൾ ടിക്കറ്റിംഗ് രീതിയിൽ എയർ-റെയിൽ ബുക്കിംഗുകൾ ഒന്നിച്ചു നടത്താനുള്ള ഓപ്ഷനുകളും റെയിൽവേ സ്റ്റേഷനുകളിൽ പ്രത്യേക പാസഞ്ചർ സേവനങ്ങളും ഇരു കമ്പനികളും പരിശോധിച്ചുവരികയാണ്. പദ്ധതിയുടെ ഔദ്യോഗിക ഉദ്ഘാടന തീയതി പ്രഖ്യാപിച്ചിട്ടില്ലെങ്കിലും, ടൂറിസം വികസനത്തിനും രാജ്യത്തിന്റെ സമ്പദ്‌വ്യവസ്ഥയുടെ വളർച്ചയ്ക്കും ഈ സംയോജിത ഗതാഗത ശൃംഖല വലിയ കരുത്താകുമെന്നാണ് വിലയിരുത്തൽ.
