ദുബായ് : യുഎഇയിൽ 15 വയസ്സിൽ താഴെയുള്ള കുട്ടികൾക്ക് സോഷ്യൽ മീഡിയ ഉപയോഗിക്കുന്നതിന് പൂർണ്ണ നിരോധനം ഏർപ്പെടുത്തിക്കൊണ്ട് പുതിയ ഡിജിറ്റൽ സുരക്ഷാ നിയമം പ്രാബല്യത്തിൽ വന്നു. ഈ പ്രായപരിധിയിലുള്ള കുട്ടികൾക്ക് പ്ലാറ്റ്ഫോമുകളിൽ സ്വന്തമായി അക്കൗണ്ട് തുടങ്ങാനോ ഉള്ളടക്കങ്ങൾ പങ്കുവെക്കാനോ സാധിക്കില്ല. മാതാപിതാക്കളുടെ അനുമതിയുണ്ടെങ്കിൽ പോലും ഈ വിലക്കിൽ ഇളവ് ലഭിക്കില്ലെന്ന് അധികൃതർ വ്യക്തമാക്കി. 15 മുതൽ 16 വയസ്സുവരെയുള്ള കൗമാരക്കാർക്ക് കർശനമായ മാതാപിതാക്കളുടെ മേൽനോട്ടത്തിലും നിയന്ത്രണങ്ങളോടെയും മാത്രമേ അക്കൗണ്ടുകൾ അനുവദിക്കൂ. ഫേസ്ബുക്ക്, ഇൻസ്റ്റാഗ്രാം, ടിക്ടോക് അടക്കമുള്ള കമ്പനികൾ എഐ (AI) അല്ലെങ്കിൽ ബയോമെട്രിക്സ് സംവിധാനങ്ങൾ വഴി കൃത്യമായ പ്രായപരിശോധന നടത്തണമെന്നും നിയമം അനുശാസിക്കുന്നു. കുട്ടികളെ സൈബർ ഭീഷണികളിൽ നിന്നും മാനസിക സമ്മർദ്ദങ്ങളിൽ നിന്നും സംരക്ഷിക്കുന്നതിന്റെ ഭാഗമായാണ് ഈ നടപടി.
