ദുബായ് : യുഎഇയിലെ പ്രമുഖ ബൈ നൗ പേ ലേറ്റർ (BNPL) സേവനദാതാക്കളായ ടാബി (Tabby) ഉപഭോക്താക്കൾക്ക് അബദ്ധത്തിൽ സമ്മാന ഇമെയിൽ അയച്ച സംഭവത്തിൽ ക്ഷമാപണം നടത്തി. ജൂൺ 26 വെള്ളിയാഴ്ചയാണ് യുഎഇയിലെ നിരവധി താമസക്കാർക്ക് 5,000 ദിർഹം മൂല്യമുള്ള എമിറേറ്റ്സ് ഫ്ലൈറ്റ് വൗച്ചർ സമ്മാനമായി ലഭിച്ചുവെന്ന തരത്തിൽ ടാബിയിൽ നിന്ന് ഔദ്യോഗിക ഇമെയിൽ ലഭിച്ചത്. എന്നാൽ മണിക്കൂറുകൾക്കകം ഇത് സാങ്കേതിക പിഴവ് മൂലം സംഭവിച്ചതാണെന്ന് വ്യക്തമാക്കി കമ്പനി രണ്ടാമതൊരു ഇമെയിൽ കൂടി അയക്കുകയായിരുന്നു.
ടാബി കാർഡ് ഉടമകൾക്കായി ജൂൺ 21 വരെ സംഘടിപ്പിച്ച റാഫിളിൽ പങ്കെടുത്തവർക്കായിരുന്നു ഈ സമ്മാനം പ്രഖ്യാപിച്ചിരുന്നത്. എന്നാൽ ഈ മത്സരത്തിൽ പങ്കെടുക്കാത്തവർക്കും ടാബി കാർഡ് ഇല്ലാത്തവർക്കും വരെ വൗച്ചർ ലഭിച്ചെന്ന ഇമെയിൽ പോയതോടെയാണ് കമ്പനി അടിയന്തരമായി തിരുത്തുമായി രംഗത്തെത്തിയത്. ഉപഭോക്താക്കൾക്ക് തങ്ങൾ നൽകിയ വലിയ പ്രതീക്ഷ പെട്ടെന്ന് പിൻവലിക്കേണ്ടി വന്നതിലുള്ള ഖേദവും ഇമെയിൽ വഴി വിവരങ്ങൾ നൽകിയവരുടെ ഡാറ്റ സുരക്ഷിതമായി ഇല്ലാതാക്കുമെന്നും ടാബി അറിയിച്ചു. വൗച്ചർ ലഭിച്ചെന്ന സന്തോഷത്തിൽ നിന്ന് പെട്ടെന്ന് നിരാശയിലേക്ക് വീണ ഉപഭോക്താക്കൾ തങ്ങളുടെ അമർഷം സോഷ്യൽ മീഡിയയിലൂടെ പങ്കുവെക്കുന്നുണ്ട്.
