PrivateSector

അബുദാബി : 50-ലധികം ജീവനക്കാരുള്ള സ്വകാര്യ കമ്പനികൾ തങ്ങളുടെ അർദ്ധവാർഷിക സ്വദേശിവൽക്കരണ ലക്ഷ്യങ്ങൾ ജൂൺ 30-നകം പൂർത്തിയാക്കണമെന്ന് യുഎഇ മാനവ വിഭവശേഷി, സ്വദേശിവൽക്കരണ മന്ത്രാലയം ആവശ്യപ്പെട്ടു. വിദഗ്ധ തസ്തികകളിൽ ഒരു ശതമാനം സ്വദേശികളെ അധികമായി നിയമിക്കണമെന്ന ലക്ഷ്യം കൈവരിക്കാൻ ഇനി ഏകദേശം 56 ദിവസങ്ങൾ മാത്രമാണ് അവശേഷിക്കുന്നത്. ഈ സാഹചര്യത്തിൽ, കമ്പനികൾ തങ്ങളുടെ തൊഴിൽ പദ്ധതികൾ വേഗത്തിലാക്കണമെന്നും സ്വദേശി ഉദ്യോഗാർത്ഥികളെ കണ്ടെത്താൻ ‘നാഫിസ്’ (Nafis) പ്ലാറ്റ്‌ഫോം പരമാവധി പ്രയോജനപ്പെടുത്തണമെന്നും മന്ത്രാലയം നിർദ്ദേശിച്ചു.

ജൂലൈ ഒന്നാം തീയതി മുതൽ മന്ത്രാലയം കമ്പനികളിലെ സ്വദേശിവൽക്കരണത്തിന്റെ പുരോഗതി പരിശോധിച്ചു തുടങ്ങും. പുതിയതായി നിയമിതരായ സ്വദേശികളെ സോഷ്യൽ സെക്യൂരിറ്റി ഫണ്ടുകളിൽ രജിസ്റ്റർ ചെയ്തിട്ടുണ്ടെന്നും അവർക്കുള്ള വിഹിതം കൃത്യമായി അടയ്ക്കുന്നുണ്ടെന്നും അധികൃതർ ഉറപ്പുവരുത്തും. നിശ്ചിത സമയത്തിനുള്ളിൽ നിയമനം പൂർത്തിയാക്കാത്ത സ്ഥാപനങ്ങൾ പിഴയൊടുക്കേണ്ടി വരും. സ്വകാര്യ മേഖലയിൽ സ്വദേശികളുടെ പങ്കാളിത്തം വർദ്ധിപ്പിക്കാനും തൊഴിൽ വിപണി കൂടുതൽ കരുത്തുറ്റതാക്കാനുമുള്ള ദേശീയ ദൗത്യത്തിന്റെ ഭാഗമായാണ് ഈ നടപടികൾ.

സ്വദേശിവൽക്കരണവുമായി ബന്ധപ്പെട്ട് നടത്തുന്ന നിയമലംഘനങ്ങൾ റിപ്പോർട്ട് ചെയ്യാൻ പൊതുജനങ്ങൾക്ക് മന്ത്രാലയത്തിന്റെ കോൾ സെന്റർ വഴിയോ സ്മാർട്ട് ആപ്പ് വഴിയോ സാധിക്കും. ‘വ്യാജ സ്വദേശിവൽക്കരണം’ (Fake Emiratisation) പോലുള്ള തെറ്റായ പ്രവണതകൾക്കെതിരെ മന്ത്രാലയം കർശന മുന്നറിയിപ്പ് നൽകി. ഇത്തരം നിയമലംഘനങ്ങൾ കണ്ടെത്താൻ അത്യാധുനിക ഡിജിറ്റൽ മോണിറ്ററിംഗ് സംവിധാനം സജ്ജമാക്കിയിട്ടുണ്ടെന്നും കുറ്റക്കാർക്കെതിരെ നിയമനടപടികൾ സ്വീകരിക്കുമെന്നും അധികൃതർ വ്യക്തമാക്കി. സ്വകാര്യ മേഖലയിൽ സ്വദേശികൾക്ക് കൂടുതൽ അവസരങ്ങൾ നൽകുന്നത് രാജ്യത്തിന്റെ സാമ്പത്തിക വളർച്ചയ്ക്കും സുസ്ഥിരമായ ബിസിനസ് അന്തരീക്ഷത്തിനും അനിവാര്യമാണെന്ന് മന്ത്രാലയം കൂട്ടിച്ചേർത്തു.