അബുദാബി : യുഎഇയിലെ വിവിധ സ്കൂളുകളിലും സർവ്വകലാശാലകളിലും അത്യാധുനിക സ്റ്റെം (STEM – Science, Technology, Engineering, Mathematics) ലാബുകൾ സ്ഥാപിച്ച് പ്രമുഖ വ്യവസായ സ്ഥാപനമായ എമിറേറ്റ്സ് ഗ്ലോബൽ അലുമിനിയം (EGA). രാജ്യത്തെ ഭാവി വ്യവസായ പ്രതിഭകളെ വാർത്തെടുക്കുക എന്ന ലക്ഷ്യത്തോടെയാണ് ഈ പദ്ധതി നടപ്പിലാക്കുന്നത്.
അൽ സമഹ സ്കൂൾ, അൽ റഹ്ബ സ്കൂൾ, അൽ ഫലാഹിയ സ്കൂൾ, ദുബായ് നാഷണൽ സ്കൂൾ, സായിദ് യൂണിവേഴ്സിറ്റി, ഹയർ കോളേജ് ഓഫ് ടെക്നോളജി (HCT) എന്നിവയുമായി സഹകരിച്ചാണ് ഇജിഎ ലാബുകൾ നിർമ്മിച്ചിരിക്കുന്നത്. പ്രതിവർഷം 2,600-ലധികം വിദ്യാർത്ഥികൾക്ക് ഈ പദ്ധതിയുടെ നേരിട്ടുള്ള പ്രയോജനം ലഭിക്കും. എൻജിനീയറിങ്, പ്രൊഡക്ട് ഡെവലപ്മെന്റ് തുടങ്ങിയ മേഖലകളിലെ പ്രായോഗിക പരിശീലനവും അത്യാധുനിക ഉപകരണങ്ങളും ഈ ലാബുകളിൽ ലഭ്യമാക്കും. ഇതിന് പുറമെ അധ്യാപകർക്കും ട്രെയിനർമാർക്കും ആവശ്യമായ പ്രത്യേക പരിശീലനവും കമ്പനി നൽകുന്നുണ്ട്. കമ്പനിയുടെ ‘എഞ്ചിനീയർ ദ ഫ്യൂച്ചർ’ പദ്ധതി വഴി 2017 മുതൽ ഇതുവരെ 36,000-ത്തിലധികം വിദ്യാർത്ഥികളിലേക്ക് തങ്ങൾ എത്തിച്ചേർന്നിട്ടുണ്ടെന്നും, ഈ ലാബുകൾ വഴി വിദ്യാഭ്യാസവും വ്യവസായ മേഖലയും തമ്മിലുള്ള ദൂരം കുറയ്ക്കാൻ സാധിക്കുമെന്നും ഇജിഎ ചീഫ് എക്സിക്യൂട്ടീവ് ഓഫീസർ അബ്ദുൽനാസർ ബിൻ കൽബാൻ പറഞ്ഞു.