ദുബായ് : യുഎഇയിൽ ചൂട് ശക്തമായി തുടരുമെന്നും ഉൾപ്രദേശങ്ങളിൽ ഇന്ന് താപനില 47 ഡിഗ്രി സെൽഷ്യസ് വരെ ഉയർന്നേക്കുമെന്നും ദേശീയ കാലാവസ്ഥാ നിരീക്ഷണ കേന്ദ്രം (NCM). പൊതുവെ തെളിഞ്ഞ കാലാവസ്ഥയായിരിക്കുമെങ്കിലും രാജ്യത്തിന്റെ കിഴക്കൻ മേഖലകളിൽ ചെറിയ രീതിയിൽ മേഘാവൃതമാകാൻ സാധ്യതയുണ്ട്. മണിക്കൂറിൽ 35 കിലോമീറ്റർ വേഗതയിൽ വരെ കാറ്റടിക്കാൻ സാധ്യതയുള്ളതിനാൽ പകൽ സമയങ്ങളിൽ ചെറിയ പൊടിക്കാറ്റിനും സാധ്യതയുണ്ട്.
ഇന്ന് ദുബായിൽ 41 ഡിഗ്രിയും അബുദാബിയിൽ 43 ഡിഗ്രിയും താപനില രേഖപ്പെടുത്തുമ്പോൾ അൽ ഐനിലാണ് ഏറ്റവും കൂടുതൽ ചൂട് അനുഭവപ്പെടുക; ഇവിടെ 46 ഡിഗ്രി വരെ ചൂട് ഉയർന്നേക്കും. രാത്രി സമയങ്ങളിലും ചൊവ്വാഴ്ച പുലർച്ചെയും തീരദേശ മേഖലകളിൽ അന്തരീക്ഷ ഈർപ്പം (Humidity) വർദ്ധിക്കുമെന്നും ഇത് മൂടൽമഞ്ഞിന് (Fog/Mist) കാരണമാകുമെന്നും മുന്നറിയിപ്പുണ്ട്. അതിനാൽ ചൊവ്വാഴ്ച പുലർച്ചെ വാഹനങ്ങളുമായി പുറത്തിറങ്ങുന്നവർ കടുത്ത ജാഗ്രത പാലിക്കണം. കൂടാതെ ഉച്ചയ്ക്ക് ശേഷം ഒമാൻ കടലിലും അറേബ്യൻ കടലിലും തിരമാലകൾ 6 അടി വരെ ഉയരാൻ സാധ്യതയുള്ളതിനാൽ കടൽ പ്രക്ഷുബ്ധമായിരിക്കും. ഈ സാഹചര്യത്തിൽ വൈകുന്നേരങ്ങളിൽ ബീച്ചുകൾ സന്ദർശിക്കുന്നതും കടലിൽ ഇറങ്ങുന്നതും ഒഴിവാക്കണമെന്ന് അധികൃതർ നിർദ്ദേശിച്ചു.