ദുബായ് : ദുബായ് ക്വാളിറ്റി ഗ്രൂപ്പിന്റെ വാർഷിക പുരസ്കാരങ്ങളിൽ 16 അവാർഡുകൾ തൂത്തുവാരി ദുബായ് പോലീസ്. യുഎഇയിലെയും ഗൾഫ് മേഖലയിലെയും സർക്കാർ-സ്വകാര്യ സ്ഥാപനങ്ങളിൽ നിന്നുള്ള 146 വിജയികളെ ആദരിച്ച ചടങ്ങിലാണ് ദുബായ് പോലീസ് ഈ നേട്ടം കൈവരിച്ചത്. സ്ത്രീ ശാക്തീകരണം, ഇന്നൊവേഷൻ, ആർട്ടിഫിഷ്യൽ ഇന്റലിജൻസ്, ഡിജിറ്റൽ പരിവർത്തനം, സുസ്ഥിരത തുടങ്ങി വിവിധ വിഭാഗങ്ങളിലായി മികച്ച നേട്ടം കൈവരിച്ചതിനാണ് ഈ പുരസ്കാരങ്ങൾ. കുടുംബങ്ങൾക്കായുള്ള സഹായ പദ്ധതികൾ, അപകട സമയങ്ങളിലെ രക്ഷാപ്രവർത്തനം വേഗത്തിലാക്കാനുള്ള പ്രോജക്ടുകൾ, സ്മാർട്ട് ഗവൺമെന്റ് മുൻകൈകൾ എന്നിവയ്ക്കുള്ള അംഗീകാരമായി ദുബായ് പോലീസിന് അവാർഡുകൾ ലഭിച്ചു. അത്യാധുനിക സാങ്കേതികവിദ്യകളും ജനക്ഷേമ പ്രവർത്തനങ്ങളും മികച്ച രീതിയിൽ നടപ്പിലാക്കുന്നതിനുള്ള ദുബായ് പോലീസിന്റെ പ്രതിബദ്ധതയ്ക്കുള്ള തെളിവാണ് ഈ നേട്ടമെന്ന് അധികൃതർ വ്യക്തമാക്കി.
