ദുബായ് : ആഗോള നഗരവികസന രംഗത്ത് പുതിയ ചരിത്രമെഴുതി ദുബായുടെ വികസന മാതൃകയെ ഒരു ഔദ്യോഗിക ഭരണ-മാനേജ്മെന്റ് തത്വശാസ്ത്രമാക്കി മാറ്റി യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തും. “ദുബായ്-ഇറ്റ്” (Dubai-it) എന്ന പുതിയ വാക്ക് ഔദ്യോഗികമായി പ്രഖ്യാപിച്ചുകൊണ്ട്, “ഏറ്റവും ചുരുങ്ങിയ സമയത്തിനുള്ളിൽ അങ്ങേയറ്റത്തെ മികവോടെ അസാധാരണമായ നേട്ടങ്ങൾ കൈവരിക്കുക” എന്നാണ് ഇതുകൊണ്ട് അർത്ഥമാക്കുന്നതെന്ന് അദ്ദേഹം വ്യക്തമാക്കി. കേവലം ആകാശചുംബികളായ കെട്ടിടങ്ങളുടെയോ ആഡംബരങ്ങളുടെയോ നഗരമെന്ന കാരിക്കേച്ചറുകൾക്കപ്പുറം; വ്യാപാരം, വ്യോമയാനം, ഐടി, നിർമ്മിത ബുദ്ധി (AI) എന്നിവയിലൂന്നിയ ലോകത്തിലെ ഏറ്റവും വൈവിധ്യമാർന്ന സാമ്പത്തിക വ്യവസ്ഥയായി ദുബായ് മാറിക്കഴിഞ്ഞു. ദീർഘവീക്ഷണത്തോടെയുള്ള ആസൂത്രണം, ബിസിനസ്സ് സൗഹൃദ നയങ്ങൾ, അതിവേഗത്തിലുള്ള നടപ്പാക്കൽ എന്നിവയാണ് 200-ലധികം രാജ്യക്കാരായ പ്രവാസികൾ സുരക്ഷിതമായി ജീവിക്കുന്ന ദുബായെ ആഗോള വികസനത്തിന്റെ പുതിയ വേർബും (Verb) മാതൃകയുമാക്കുന്നത്.
