ദുബായ് : ദുബായിലെ ജനസംഖ്യാ വളർച്ചയും മേഖലകളുടെ വികസനവും കണക്കിലെടുത്ത് കൂടുതൽ സ്ഥലങ്ങളിൽ ഡ്രൈവിംഗ് ട്രെയിനിംഗ് ഇൻസ്റ്റിറ്റ്യൂട്ടുകൾക്കും അവയുടെ ബ്രാഞ്ചുകൾക്കും ലൈസൻസ് നൽകാൻ അനുമതിയുമായി റോഡ്സ് ആൻഡ് ട്രാൻസ്പോർട്ട് അതോറിറ്റി (RTA). പുതിയ താമസമേഖലകളിലുള്ളവർക്ക് ഡ്രൈവിംഗ് പഠന സൗകര്യം എളുപ്പത്തിൽ ലഭ്യമാക്കുന്നതിനൊപ്പം ഈ രംഗത്തേക്ക് പുതിയ നിക്ഷേപകരെ ആകർഷിക്കുകയുമാണ് ആർടിഎ ഇതിലൂടെ ലക്ഷ്യമിടുന്നത്.
വാദി അൽ സഫ (Wadi Al Safa), ജബൽ അലി (Jebel Ali), മുഷ്രിഫ് (Mushrif), അൽ മക്തൂം സിറ്റി (Al Maktoum City), മദിനാത് ഹിന്ദ് (Madinat Hind) എന്നീ പുതിയ അഞ്ച് മേഖലകളിലാണ് ഡ്രൈവിംഗ് സ്കൂളുകൾ ആരംഭിക്കാൻ അനുമതി നൽകിയിരിക്കുന്നത്. നിലവിലുള്ള സ്ഥാപനങ്ങൾക്കും പുതിയ നിക്ഷേപകർക്കും നിശ്ചിത മാനദണ്ഡങ്ങൾ പാലിച്ച് ബ്രാഞ്ചുകൾ തുടങ്ങാൻ അപേക്ഷിക്കാമെന്ന് ആർടിഎ ലൈസൻസിങ് ഏജൻസി സിഇഒ അഹമ്മദ് മഹ്ബൂബ് വ്യക്തമാക്കി. പുതിയ നിക്ഷേപകർക്ക് ആവശ്യമായ എല്ലാ പിന്തുണയും അതോറിറ്റി ഉറപ്പുനൽകുന്നുണ്ട്.
