ദുബായ് : ദുബായിലെ വാടകക്കാർക്ക് സാമ്പത്തിക ബാധ്യത കുറയ്ക്കുന്നതിനായി പുത്തൻ ‘ഫ്ലെക്സി റെന്റ്’ (Flexi Rent) പദ്ധതി പ്രഖ്യാപിച്ച് ദുബായ് ലാൻഡ് ഡിപ്പാർട്ട്മെന്റ് (DLD). ഇതനുസരിച്ച് പരമ്പരാഗതമായി വർഷത്തിൽ 3 അല്ലെങ്കിൽ 4 ചെക്കുകളായി വാടക നൽകുന്നതിന് പകരം, വാടകക്കാർക്ക് അവരുടെ സൗകര്യപ്രദമായ രീതിയിൽ പ്രതിമാസമോ (Monthly), മൂന്ന് മാസത്തിലൊരിക്കലോ (Quarterly), ആറ് മാസത്തിലൊരിക്കലോ (Semi-annual) ഉള്ള പേയ്മെന്റ് പ്ലാനുകൾ തിരഞ്ഞെടുക്കാം. ഡെബിറ്റ് കാർഡ്, ക്രെഡിറ്റ് കാർഡ് അല്ലെങ്കിൽ ചെക്കുകൾ എന്നിവ വഴി പണം അടയ്ക്കാനും സാധിക്കും.
വാടക തുകയിൽ മാറ്റമുണ്ടാകില്ലെങ്കിലും അത് തുല്യ ഗഡുക്കളായി വിഭജിച്ചു നൽകാം. ഉദാഹരണത്തിന്, 3 മാസത്തേക്ക് 20,000 ദിർഹം നൽകിയിരുന്ന ഒരാൾക്ക് ഇനി മുതൽ പ്രതിമാസം 5,000 ദിർഹം വീതം നൽകാം. നിലവിൽ വാസൽ പ്രോപ്പർട്ടീസ്, ദിയാർ, റോക്കി റിയൽ എസ്റ്റേറ്റ് ഉൾപ്പെടെ ദുബായിലെ 12 പ്രമുഖ റിയൽ എസ്റ്റേറ്റ് ഡെവലപ്പർമാരുമായി ചേർന്നാണ് ഡിഎൽഡി ഈ പദ്ധതി നടപ്പിലാക്കുന്നത്. ഈ കമ്പനികളുടെ കീഴിൽ താമസിക്കുന്നവർക്കും പുതിയതായി വാടകയ്ക്കെടുക്കുന്നവർക്കും ഈ ആനുകൂല്യം ലഭിക്കും. കൂടാതെ, പേയ്മെന്റ് പ്ലാനുകളിൽ മാറ്റം വരുത്തുമ്പോൾ ഈടാക്കിയിരുന്ന അധിക ഫീസുകളും അതോറിറ്റി ഒഴിവാക്കിയിട്ടുണ്ട്.
