അബുദാബി : അബുദാബി അടിയന്തര, പ്രതിസന്ധി, ദുരന്ത നിവാരണ കേന്ദ്രം (ADMC) ഒമ്പതാമത് ‘അണ്ടർസ്റ്റാൻഡിങ് റിസ്ക് ഗ്ലോബൽ ഫോറം’ നടത്തുന്ന തീയതികളിൽ മാറ്റം പ്രഖ്യാപിച്ചു. നേരത്തെ 2026 ഒക്ടോബറിൽ നടത്താൻ നിശ്ചയിച്ചിരുന്ന ഈ അന്താരാഷ്ട്ര സമ്മേളനം, ഇനി 2027 മെയ് 10 മുതൽ 14 വരെ അബുദാബിയിൽ വെച്ച് നടക്കും. ലോകബാങ്ക് ഗ്രൂപ്പിന്റെ ഭാഗമായ ‘ഗ്ലോബൽ ഫെസിലിറ്റി ഫോർ ഡിസാസ്റ്റർ റിഡക്ഷൻ ആൻഡ് റിക്കവറി’യുമായി ആലോചിച്ചാണ് അന്താരാഷ്ട്ര മാനദണ്ഡങ്ങൾ മുൻനിർത്തി ഈ പുതിയ തീരുമാനം കൈക്കൊണ്ടത്.
മിഡിൽ ഈസ്റ്റിൽ ആദ്യമായാണ് ഈ ആഗോള ഫോറം അരങ്ങേറുന്നത് എന്ന പ്രത്യേകതയുമുണ്ട്. ദുരന്ത നിവാരണം, പ്രതിരോധം എന്നിവയുമായി ബന്ധപ്പെട്ട ലോകത്തിലെ ഏറ്റവും പ്രമുഖമായ പ്ലാറ്റ്ഫോമുകളിലൊന്നാണിത്. അബുദാബി അഡ്നെക് (ADNEC) സെന്ററിൽ വെച്ച് നടക്കുന്ന ഈ സമ്മേളനത്തിൽ ലോകമെമ്പാടുമുള്ള 1,500-ലധികം വിദഗ്ദ്ധരും ഗവേഷകരും ഭരണകർത്താക്കളും പങ്കെടുക്കും. നൂതന സാങ്കേതികവിദ്യകളിലൂടെയും വിജ്ഞാന കൈമാറ്റത്തിലൂടെയും ഭാവിയിലെ വെല്ലുവിളികളെയും ദുരന്തങ്ങളെയും എങ്ങനെ പ്രതിരോധിക്കാം എന്നതിനെക്കുറിച്ചുള്ള ചർച്ചകൾക്കും സംവാദങ്ങൾക്കുമാണ് അബുദാബി ആതിഥേയത്വം വഹിക്കുക.