ദുബായ് : ഇന്ത്യൻ രൂപ, പാകിസ്താൻ രൂപ, ഫിലിപ്പൈൻ പെസോ തുടങ്ങിയ പ്രമുഖ ഏഷ്യൻ കറൻസികളുടെ മൂല്യം യുഎഇ ദിർഹത്തിനെതിരെ ദുർബലമായി തുടരുന്നത് പ്രവാസികൾക്ക് അനുകൂലമായ അവസരമൊരുക്കുന്നു. നിലവിൽ കറൻസികൾ സമീപകാലത്തെ ഏറ്റവും കുറഞ്ഞ നിരക്കുകളിലാണ് വ്യാപാരം നടത്തുന്നത്. ഇന്ത്യൻ രൂപ ദിർഹത്തിനെതിരെ കഴിഞ്ഞ ദിവസങ്ങളിൽ 26.08 എന്ന റെക്കോർഡ് നിരക്കിലേക്ക് എത്തിയിരുന്നു. നിലവിൽ നേരിയ വ്യത്യാസത്തിൽ 25.59 ലാണ് രൂപയുടെ വ്യാപാരം നടക്കുന്നത്.
ഈ മികച്ച നിരക്ക് പ്രയോജനപ്പെടുത്തി പ്രവാസി കുടുംബങ്ങൾ തങ്ങളുടെ സമ്പാദ്യം നാട്ടിലേക്ക് അയക്കാൻ അനുകൂലമായ സമയമാണിതെന്ന് എക്സ്ചേഞ്ച് ഹൗസുകൾ വിലയിരുത്തുന്നു. പലരും തുക ഭാഗികമായി ഇപ്പോൾ അയക്കുകയും, നിരക്കുകൾ ഇനിയും ഉയർന്നേക്കുമെന്ന പ്രതീക്ഷയിൽ ബാക്കി തുക മാറ്റിവെക്കുകയുമാണ് ചെയ്യുന്നത്. ജൂൺ 25-ലെ കണക്കനുസരിച്ച് പാകിസ്താൻ രൂപ മാറ്റമില്ലാതെ 76-ലും, ഫിലിപ്പൈൻ പെസോ കഴിഞ്ഞ ദിവസത്തെക്കാൾ നേരിയ തോതിൽ ഇടിഞ്ഞ് 16.67 ലുമാണ് വ്യാപാരം തുടരുന്നത്. യുഎസ് ഡോളറിന്റെ മൂല്യത്തിലുണ്ടാകുന്ന മാറ്റങ്ങളാണ് ദിർഹവുമായുള്ള വിനിമയ നിരക്കുകളെ പ്രധാനമായും സ്വാധീനിക്കുന്നത്.
