അബുദാബി : യുഎഇയിലെ ഏറ്റവും ഇരുണ്ട പ്രദേശമായ അൽ ഖുവായിൽ രാത്രിയാകാശത്ത് ക്ഷീരപഥം (Milky Way) നഗ്നനേത്രങ്ങൾ കൊണ്ട് കാണാൻ ഈ ജൂലൈ മാസത്തിൽ സഞ്ചാരികൾക്ക് സുവർണ്ണാവസരം. അബുദാബിയിൽ നിന്ന് 100 കിലോമീറ്റർ അകലെയുള്ള ഈ മരുഭൂമി പ്രദേശത്തേക്ക് സ്വന്തം വാഹനങ്ങളിൽ പോകുന്നവർക്ക് സൌജന്യമായും, അല്ലാത്തവർക്ക് 400 മുതൽ 2,000 ദിർഹം വരെയുള്ള വിവിധ പാക്കേജുകളിലും ക്യാമ്പിംഗ് നടത്തി ഈ കാഴ്ച ആസ്വദിക്കാം. രാത്രി 9 മണി മുതൽ പുലർച്ചെ 3 മണി വരെയാണ് ആകാശ വിസ്മയം കാണാൻ ഏറ്റവും അനുയോജ്യം. സ്വന്തമായി പോകുന്നവർ ഭക്ഷണവും വെള്ളവും കരുതണമെന്നും മൊബൈൽ സിഗ്നൽ ലഭിക്കാത്തതിനാൽ ഓഫ്ലൈൻ മാപ്പുകൾ സൂക്ഷിക്കണമെന്നും അധികൃതർ നിർദ്ദേശിക്കുന്നു.
