ദുബായ് : വിനോദസഞ്ചാരികൾക്കായി ടൂറിസ്റ്റ് വിസാ നടപടികൾ 48 പ്രവൃത്തിമണിക്കൂറിനുള്ളിൽ വേഗത്തിലാക്കി ദുബായ്. ആവശ്യമായ രേഖകൾ സമർപ്പിച്ചാൽ വിസ വേഗത്തിൽ ലഭ്യമാകുമെന്നത് അവസാന നിമിഷം യാത്ര പ്ലാൻ ചെയ്യുന്നവർക്ക് വലിയ സൗകര്യമാകും. ഇതോടൊപ്പം വേനൽക്കാലത്ത് ദുബായിലേക്ക് എത്തുന്ന സഞ്ചാരികൾക്ക് ഹോട്ടൽ താമസത്തിനും വിനോദങ്ങൾക്കും 60 ശതമാനം വരെ വൻ വിലക്കിഴിവാണ് വിവിധ കമ്പനികൾ ഒരുക്കിയിരിക്കുന്നത്.
സാധാരണയായി ശൈത്യകാലത്തുള്ള തിരക്കിൽ വലിയ തുക ഈടാക്കുന്ന ഹോട്ടൽ മുറികൾ വേനൽക്കാലത്ത് വെറും 139 ദിർഹം മുതൽ ലഭ്യമാണ്. കൂടാതെ സഞ്ചാരികളുടെ പ്രധാന ആകർഷണങ്ങളായ ഡെസേർട്ട് സഫാരി, ജെറ്റ് സ്കീ റൈഡുകൾ, പ്രീമിയം ഡ്യൂൺ ബഗ്ഗി റൈഡുകൾ എന്നിവയ്ക്കും പകുതിയോളം വിലക്കുറവുണ്ട്. തീം പാർക്കുകൾ, അക്വേറിയങ്ങൾ തുടങ്ങിയ വിനോദകേന്ദ്രങ്ങളുടെ ടിക്കറ്റുകൾ കൗണ്ടറുകളിൽ നിന്ന് നേരിട്ട് വാങ്ങാതെ ഓൺലൈനായി ബുക്ക് ചെയ്താൽ ഫാമിലി പാക്കേജുകൾ വഴി വലിയ തുക ലാഭിക്കാമെന്നും ട്രാവൽ ഏജന്റുമാർ വ്യക്തമാക്കുന്നു. വേഗത്തിലുള്ള വിസയും ആകർഷകമായ ഈ ഓഫറുകളും ദുബായിയെ മികച്ചൊരു സമ്മർ ഡെസ്റ്റിനേഷനാക്കി മാറ്റുകയാണ്.
