ദുബായ് : അതിർത്തി സുരക്ഷ ശക്തമാക്കുന്നതിന്റെ ഭാഗമായി ദുബായിൽ കഴിഞ്ഞ 18 മാസത്തിനിടെ നടത്തിയ പരിശോധനകളിൽ ക്രമക്കേടുകൾ കണ്ടെത്തിയ 900-ലധികം രേഖകൾ ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സ് (GDRFA) പിടിച്ചെടുത്തു. അത്യാധുനിക സാങ്കേതികവിദ്യകളുടെ സഹായത്തോടെ ഇരുപതിനായിരത്തിലധികം (20,000) രേഖകളാണ് വിദഗ്ദ്ധ സംഘം സൂക്ഷ്മ പരിശോധനയ്ക്ക് വിധേയമാക്കിയത്. ഉദ്യോഗസ്ഥരുടെ വൈദഗ്ധ്യം വർദ്ധിപ്പിക്കുന്നതിനായി 120 മണിക്കൂറിലധികം നീണ്ട പ്രത്യേക പരിശീലനവും ഇതിനായി നൽകിയിരുന്നു.
എൺപതിലധികം രാജ്യങ്ങളിൽ നിന്നുള്ള വിവരങ്ങൾ ഉൾപ്പെടുത്തി ദുബായ് ഇലക്ട്രോണിക് ഡോക്യുമെന്റ് സിസ്റ്റം വിപുലീകരിച്ചിട്ടുണ്ട്. ഇവിടുത്തെ ഡോക്യുമെന്റ് എക്സാമിനേഷൻ ലബോറട്ടറിക്ക് അന്താരാഷ്ട്ര നിലവാരത്തിലുള്ള ‘ISO/IEC 17025’ അംഗീകാരവും ലഭിച്ചു. ജർമ്മനിയിലെ ഫ്രാങ്ക്ഫർട്ട് എയർപോർട്ടിലെ ഫെഡറൽ പൊലീസ് ലബോറട്ടറി ഉൾപ്പെടെയുള്ള ആഗോള സ്ഥാപനങ്ങളുമായി സഹകരിച്ചാണ് ദുബായ് അതിർത്തി സുരക്ഷാ സംവിധാനങ്ങൾ കൂടുതൽ കുറ്റമറ്റതാക്കുന്നത്.
