ബീജിങ് : ചൈനയിൽ നടക്കുന്ന ബീജിങ് അന്താരാഷ്ട്ര പുസ്തകോത്സവത്തിൽ (BIBF 2026) യുഎഇയുടെ സാംസ്കാരിക സാന്നിധ്യം ശക്തമാക്കി എമിറേറ്റ്സ് പബ്ലിഷേഴ്സ് അസോസിയേഷൻ (EPA). ഇത്തവണത്തെ മേളയിൽ യുഎഇയാണ് ‘അതിഥി രാജ്യം’ (Guest of Honour). ജൂൺ 17 മുതൽ 21 വരെ നീണ്ടുനിൽക്കുന്ന മേളയിൽ യുഎഇ എംബസിയും സാംസ്കാരിക മന്ത്രാലയവും സംയുക്തമായി ഒരുക്കിയ ‘അൽ ബൈത് അൽ എമിറാത്തി’ പവലിയനിലാണ് അസോസിയേഷൻ പങ്കെടുന്നത്.
യുഎഇയിലെ പ്രസാധകർക്ക് ചൈനീസ് വിപണിയിൽ പുതിയ അവസരങ്ങൾ കണ്ടെത്താനും അറബ് എഴുത്തുകാരുടെ കൃതികൾ അന്താരാഷ്ട്ര തലത്തിൽ എത്തിക്കാനും ഈ പങ്കാളിത്തം വഴി സാധിക്കുമെന്ന് ഇപിഎ എക്സിക്യൂട്ടീവ് ഡയറക്ടർ റാഷിദ് അൽ കൂസ് വ്യക്തമാക്കി. ഇതിന്റെ ഭാഗമായി എമിറാത്തി-ചൈനീസ് പ്രസാധകരുടെ പ്രത്യേക നെറ്റ്വർക്കിങ് യോഗങ്ങളും ഇരുരാജ്യങ്ങളിലെയും വായനാശീലങ്ങളെക്കുറിച്ചുള്ള പാനൽ ചർച്ചകളും മേളയിൽ സംഘടിപ്പിച്ചിട്ടുണ്ട്. ഗാഫ് പബ്ലിഷിങ്, അജ്യാൽ പബ്ലിഷിങ് ഹൗസ് ഉൾപ്പെടെയുള്ള യുഎഇയിലെ പ്രമുഖ പ്രസാധകർ പവലിയന്റെ ഭാഗമാണ്.
