ദുബായ് : നഗരത്തിലെ യാത്രാക്ലേശം പരിഹരിക്കുന്നതിനായി റോഡ്സ് ആൻഡ് ട്രാൻസ്പോർട്ട് അതോറിറ്റി (RTA) നടപ്പിലാക്കുന്ന പ്രധാന റോഡ് വികസന പദ്ധതികളുടെ പുരോഗതി പുറത്തുവിട്ടു. ഹെസ്സ സ്ട്രീറ്റ് രണ്ടാം ഘട്ട വികസനത്തിലൂടെ യാത്രാസമയം 24 മിനിറ്റിൽ നിന്ന് 5 മിനിറ്റായി കുറയും. പണികൾ 90% പൂർത്തിയായ ദുബായ് ഹാർബർ പാലം യാത്രാസമയം 3 മിനിറ്റാക്കി ചുരുക്കി. ഔദ് മേത്ത റോഡ് നവീകരണത്തിലൂടെ വാഹനശേഷി 50% വർദ്ധിക്കും. ഉമ്മു സുഖീം സ്ട്രീറ്റ് വികസനം 70 ശതമാനവും, അൽ ഷിന്ദഗ കോറിഡോറിന്റെ ഭാഗമായ അൽ ഖലീജ് സ്ട്രീറ്റ് ടണൽ നിർമ്മാണം 80 ശതമാനവും പൂർത്തിയായി. വേൾഡ് ട്രേഡ് സെന്റർ റൗണ്ട് എബൗട്ട് മാറ്റി സിഗ്നൽ ജംഗ്ഷനാക്കുന്ന പദ്ധതിയുടെ 60% പണികളും കഴിഞ്ഞു. ഈ പദ്ധതികൾ പൂർത്തിയാകുന്നതോടെ ദുബായിലെ പ്രധാന റൂട്ടുകളിലെ കാത്തിരിപ്പ് സമയം 90 സെക്കൻഡ് വരെയായി കുറയും.
