ഷാർജ : സോഷ്യൽ മീഡിയ പ്ലാറ്റ്ഫോമായ ടിക് ടോക്കിലെ തർക്കത്തെ തുടർന്ന് ഷാർജയിൽ മലയാളി യുവാവ് തെരുവിൽ കുത്തേറ്റു മരിച്ചു. ദുബായിലെ ബേക്കറി ജീവനക്കാരനായ മലപ്പുറം സ്വദേശി ഇസ്മായിൽ പൊന്നൻ ഇബ്രാഹിം കുട്ടി (40) ആണ് കൊല്ലപ്പെട്ടത്. മെയ് 31-ന് നടന്ന ക്രൂരമായ കൊലപാതകവുമായി ബന്ധപ്പെട്ട് നിരവധി പ്രതികളെ അറസ്റ്റ് ചെയ്തതായി ഷാർജ പോലീസ് സ്ഥിരീകരിച്ചു.
ടിക് ടോക്കിൽ സജീവമായിരുന്ന ഇസ്മായിൽ, മറ്റ് ചില ടിക് ടോക് ഉപയോക്താക്കളുമായി ലൈവിനിടെ കടുത്ത വാക്കുതർക്കത്തിൽ ഏർപ്പെട്ടിരുന്നതായി അദ്ദേഹത്തെ ഫോളോ ചെയ്യുന്നവർ പറയുന്നു. ഓൺലൈൻ തർക്കം വ്യക്തിപരമായ വെല്ലുവിളികളിലേക്ക് നീങ്ങുകയും, നേരിട്ട് കണ്ട് പ്രശ്നം പരിഹരിക്കാൻ ഇവർ പരസ്പരം ആവശ്യപ്പെടുകയുമായിരുന്നു. ഷാർജ അൽ നഹ്ദയിലെ പാർക്കിന് സമീപം എത്തിയാൽ കാണാമെന്ന് ഇസ്മായിൽ വെല്ലുവിളിച്ചതിനെ തുടർന്ന് സ്ഥലത്തെത്തിയ സംഘം ഇദ്ദേഹത്തെ ക്രൂരമായി ആക്രമിക്കുകയായിരുന്നു. ഞായറാഴ്ച പുലർച്ചെ പരസ്യമായ തെരുവിൽ വെച്ച് കുത്തേറ്റും കമ്പി വടികൾ കൊണ്ടുള്ള അടിയേറ്റുമാണ് ഇസ്മായിൽ മരിച്ചത്. സംഭവത്തിൽ അന്വേഷണം ഊർജ്ജിതമാക്കിയ ഷാർജ പോലീസ് മണിക്കൂറുകൾക്കകം തന്നെ അക്രമികളെ വലയിലാക്കി.
