ദുബായ് : യുഎഇയിൽ ഇന്ത്യൻ കോൺസുലർ സേവനങ്ങൾ നൽകാനായി അൽഹിന്ദ് ഗ്ലോബൽ സർവീസസ് ഒരുക്കിയ പുതിയ അപേക്ഷാ കേന്ദ്രങ്ങൾ പ്രവർത്തനസജ്ജമായിട്ടും തുറക്കാനാകാതെ ഒഴിഞ്ഞുകിടക്കുന്നു. പുതിയ ടെൻഡർ നടപടികളുമായി ബന്ധപ്പെട്ട് ഡൽഹി ഹൈക്കോടതിയിൽ നടക്കുന്ന നിയമപോരാട്ടമാണ് ജൂലൈ 1 മുതൽ ആരംഭിക്കേണ്ടിയിരുന്ന ഈ കേന്ദ്രങ്ങളുടെ പ്രവർത്തനം വൈകിപ്പിക്കുന്നത്. ടെൻഡറിൽ നിന്ന് പുറത്തായ മറ്റ് രണ്ട് കമ്പനികൾ നൽകിയ ഹർജിയെ തുടർന്ന് സുപ്രീം കോടതി ‘സ്റ്റാറ്റസ് കോ’ (യഥാസ്ഥിതി) ഉത്തരവ് പുറപ്പെടുവിച്ചതാണ് നിലവിലെ പ്രതിസന്ധിക്ക് കാരണം.
ദുബായ് യുഡബ്ല്യു മാളിലെ വലിയ കേന്ദ്രം ഉൾപ്പെടെ യുഎഇയിലുടനീളമുള്ള 16 പുതിയ ഓഫീസുകളും ഇതോടെ താൽക്കാലികമായി അടഞ്ഞുകിടക്കുകയാണ്. നിലവിലെ പ്രതിസന്ധി പരിഹരിക്കാനായി അബുദാബിയിലെ ഇന്ത്യൻ എംബസിയും ദുബായിലെ കോൺസുലേറ്റും തങ്ങളുടെ ഓഫീസുകൾ വഴി നേരിട്ടാണ് ഇപ്പോൾ പാസ്പോർട്ട്, വിസ സേവനങ്ങൾ നൽകുന്നത്. തിരക്ക് ഒഴിവാക്കാനായി book.passportindiauae.com എന്ന വെബ്സൈറ്റ് വഴി മുൻകൂട്ടി അപ്പോയിന്റ്മെന്റ് എടുത്ത് വേണം ഇനി മുതൽ അപേക്ഷകർ എത്തുവാൻ.
