അജ്മാൻ : യുഎഇ കുടുംബ വർഷത്തിന്റെ ഭാഗമായി ഓഹരിയുടമകളായ സ്വദേശി കുടുംബങ്ങൾക്ക് സാമ്പത്തിക സഹായവുമായി അജ്മാൻ കോ-ഓപ്പ് (Ajman Co-op). ‘ന്യൂബോൺ’ (Newborn) എന്ന് പേരിട്ടിരിക്കുന്ന പുതിയ പദ്ധതിയിലൂടെ യോഗ്യരായ നവജാതശിശുക്കൾക്ക് ആറ് മാസത്തേക്ക് മൊത്തം 1,800 ദിർഹം മൂല്യമുള്ള ഷോപ്പിംഗ് ക്രെഡിറ്റ് ലഭിക്കും. 2026 ജനുവരി 1-നും ഡിസംബർ 31-നും ഇടയിൽ ജനിക്കുന്ന കുട്ടികൾക്കാണ് മാസം തോറും 300 ദിർഹം വീതം ആറ് മാസത്തേക്ക് ഈ ആനുകൂല്യം ലഭിക്കുക.
അജ്മാൻ കോ-ഓപ്പിന്റെ ഏത് ശാഖയിൽ നിന്നും കുഞ്ഞുങ്ങൾക്കാവശ്യമായ അവശ്യസാധനങ്ങളും മറ്റ് ഗാർഹിക സാധനങ്ങളും വാങ്ങാൻ ഈ ക്രെഡിറ്റ് ഉപയോഗിക്കാം. കുഞ്ഞുങ്ങളുടെ ജനനവുമായി ബന്ധപ്പെട്ടുണ്ടാകുന്ന അധികച്ചെലവുകൾ കുറയ്ക്കാൻ ഇത് കുടുംബങ്ങളെ സഹായിക്കുമെന്ന് അജ്മാൻ കോ-ഓപ്പ് ചീഫ് എക്സിക്യൂട്ടീവ് ഓഫീസർ അയൂബ് മുഹമ്മദ് അബ്ദുള്ള വ്യക്തമാക്കി. ഈ പദ്ധതിയിലേക്കുള്ള അപേക്ഷകൾ ജൂലൈ 1 മുതൽ സ്വീകരിച്ചു തുടങ്ങും. അപേക്ഷകൾ പരിശോധിച്ച് അംഗീകാരം നൽകിയ ശേഷമായിരിക്കും തുക ക്രെഡിറ്റ് ചെയ്യുക. ഇതിനായുള്ള യോഗ്യതാ മാനദണ്ഡങ്ങളും അപേക്ഷിക്കേണ്ട രീതിയും ഔദ്യോഗിക ചാനലുകൾ വഴി ഉടൻ പ്രഖ്യാപിക്കും.
