അബുദാബി : അബുദാബിയിലെ പ്രമുഖ ഷോപ്പിംഗ് കേന്ദ്രമായ മുഷ്രിഫ് മാളിൽ ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യയിൽ പ്രവർത്തിക്കുന്ന പുതിയ ടിക്കറ്റ് രഹിത പെയ്ഡ് പാർക്കിങ് സംവിധാനം വരുന്നു. സ്മാർട്ട് പാർക്കിങ് സാങ്കേതികവിദ്യ പ്രമുഖ കമ്പനിയായ ക്യു മൊബിലിറ്റിയും (Q Mobility) ലൈൻ ഇൻവെസ്റ്റ്മെന്റ്സ് ആൻഡ് പ്രോപ്പർട്ടിയും സംയുക്തമായാണ് മാളിൽ നടപ്പിലാക്കുന്നത്.
വരുന്ന ജൂൺ 23 മുതൽ പുതിയ സംവിധാനം പ്രവർത്തനക്ഷമമാകും. പുതിയ എഐ സാങ്കേതികവിദ്യയും ഓട്ടോമാറ്റിക് ലൈസൻസ് പ്ലേറ്റ് റെക്കഗ്നിഷനും (Automatic License Plate Recognition) ഉപയോഗിച്ച് പ്രവർത്തിക്കുന്നതിനാൽ വാഹനങ്ങൾ പാർക്കിങ്ങിൽ പ്രവേശിക്കുന്ന സമയവും പുറത്തുപോകുന്ന സമയവും സിസ്റ്റം സ്വയം രേഖപ്പെടുത്തും. തുടർന്ന് പാർക്കിങ് ഫീസ് ഉപഭോക്താക്കളുടെ ദർബ് (Darb) വാലറ്റിൽ നിന്ന് നേരിട്ട് ഈടാക്കും.
ഇതോടെ മാളിൽ പാർക്കിങ് ടിക്കറ്റുകൾ എടുക്കാനോ, പേയ്മെന്റ് മെഷീനുകൾക്ക് മുന്നിൽ വരി നിൽക്കാനോ, എസ്എംഎസ് വഴി ഫീസ് അടയ്ക്കാനോ ഉള്ള ബുദ്ധിമുട്ടുകൾ ഒഴിവാകും. മാളിലെ ഗതാഗതക്കുരുക്ക് കുറയ്ക്കാനും സന്ദർശകർക്ക് എളുപ്പത്തിൽ പാർക്കിങ് കണ്ടെത്താനും ഇത് സഹായിക്കുമെന്ന് ക്യു മൊബിലിറ്റി സിഇഓ മുഹമ്മദ് കർമസ്താജി വ്യക്തമാക്കി. ഈ സേവനം ഉപയോഗിക്കുന്നതിന് മുൻപ് ഉപഭോക്താക്കൾ തങ്ങളുടെ ദർബ് വാലറ്റിൽ ആവശ്യത്തിന് പണമുണ്ടെന്ന് ഉറപ്പുവരുത്തേണ്ടതുണ്ട്.