വാഹനങ്ങളുടെ നമ്പർ പ്ലേറ്റ് പൂർണ്ണമായും മറയുന്ന രീതിയിൽ സൈക്കിൾ ഉൾപ്പെടെയുള്ള മറ്റ് വസ്തുക്കൾ കെട്ടിവച്ച് കൊണ്ടുപോകുന്നവർക്ക് 400 ദിർഹംസ് പിഴ ചുമത്തുമെന്ന് അബുദാബി പോലീസ് മുന്നറിയിപ്പ് നൽകി. റോഡ് സുരക്ഷ ഉറപ്പാക്കുന്നതിനും നിയമലംഘനങ്ങൾ ഒഴിവാക്കുന്നതിനുമുള്ള നടപടികളുടെ ഭാഗമായാണ് ഈ കർശന നിർദ്ദേശം.
വംശനാശ ഭീഷണി നേരിടുന്നതും കച്ചവടം നിരോധിച്ചതുമായ അപൂർവ്വയിനം ജീവികളെ നിയമവിരുദ്ധമായി കൈവശം വെക്കുകയും കള്ളക്കടത്ത് നടത്തുകയും ചെയ്ത കേസിൽ ഒരു അറബ് പൗരനെ ഷാർജയിൽ വെച്ച് പോലീസ് അറസ്റ്റ് ചെയ്തു.
അൽ ഐൻ മേഖലയിലെ സഖർ ഇന്റർസെക്ഷൻ ഔദ്യോഗികമായി തുറന്നു നൽകി. അടിസ്ഥാന സൗകര്യങ്ങൾ മെച്ചപ്പെടുത്തുന്നതിനുള്ള തുടർച്ചയായ ശ്രമങ്ങളുടെ ഭാഗമായാണ് ഈ നടപടി. സഖർ ഇന്റർ സെക്ഷൻ തുറന്നത് യാത്രാ സമയം ഗണ്യമായി കുറയ്ക്കുകയും ആയിരക്കണക്കിന് ഡ്രൈവർമാരുടെ റോഡ് സുരക്ഷ വർദ്ധിപ്പിക്കുകയും ചെയ്യുമെന്ന് പ്രതീക്ഷിക്കുന്നത്. നിർമ്മാണത്തിൽ, ഓരോ ദിശയിലും മൂന്ന് വരികളുള്ള 900 മീറ്റർ തുരങ്കമാണ് പ്രധാനമായും നിർമ്മിച്ചത്. 22 മാസമെടുത്താണ് പദ്ധതി പൂർത്തിയാക്കിയത്.
ലോകത്തിലെ ശക്തമായ പാസ്‌പോര്‍ട്ടുകളുടെ പട്ടികയില്‍ യുഎഇ എട്ടാം സ്ഥാനത്തെത്തി. ഹെന്‍ലി പാസ്‌പോര്‍ട്ട് ഇന്‍ഡക്‌സ് പ്രകാരം യുഎസ്, കാനഡ തുടങ്ങിയ രാജ്യങ്ങളെ മറികടന്നാണ് യുഎഇ മുന്നിലെത്തിയത്. ഇപ്പോൾ യുഎഇ പാസ്‌പോര്‍ട്ട് ഉപയോഗിച്ച് 184 രാജ്യങ്ങളിലേക്ക് വിസയില്ലാതെ സഞ്ചരിക്കാം. വിദേശകാര്യ മന്ത്രാലയം വ്യക്തമാക്കുന്നത്, യുഎഇയുടെ തന്ത്രപരമായ ഇടപെടലുകള്‍ ഈ നേട്ടത്തിന് വഴിയൊരുക്കിയെന്നാണ്.
സ്മാര്‍ട്ട് സേഫ്റ്റി ട്രാക്കറുമായി ദുബായ്
ദുബായിലെ തൊഴില്‍ സ്ഥലങ്ങളില്‍ തൊഴിലാളികളുടെ ആരോഗ്യ സുരക്ഷ ഉറപ്പാക്കുന്നതിനായി മാനവശേഷി സ്വദേശിവല്‍ക്കരണ മന്ത്രാലയം (MoHRE) ‘സ്മാര്‍ട്ട് സേഫ്റ്റി ട്രാക്കര്‍’ പുറത്തിറക്കി. എഐ സാങ്കേതികവിദ്യയുടെ സഹായത്തോടെ സ്ഥാപനങ്ങള്‍ തൊഴില്‍ നിയമങ്ങള്‍ പാലിക്കുന്നുണ്ടെന്ന് ഉറപ്പാക്കാനും സുരക്ഷിതവും ആരോഗ്യകരവും സുസ്ഥിരവുമായ തൊഴിലിടങ്ങള്‍ രൂപപ്പെടുത്താനുമാണ് ഈ പദ്ധതി ലക്ഷ്യമിടുന്നത്.
GITEX ഗ്ലോബൽ 2025-ൽ MoHREയുടെ പങ്കാളിത്തത്തിന്റെ ഭാഗമായാണ് ഈ പ്രഖ്യാപനം. ജോലിസ്ഥല സുരക്ഷ ശക്തിപ്പെടുത്താനും പരിശോധനാ നടപടികള്‍ നവീകരിക്കാനും നിയന്ത്രണ മേല്‍നോട്ടം മെച്ചപ്പെടുത്താനും ജനറേറ്റീവ് ആര്‍ട്ടിഫിഷ്യല്‍ ഇന്റലിജന്‍സ് (GenAI) ഉള്‍പ്പെടെയുള്ള നൂതന ഡിജിറ്റല്‍ സാങ്കേതികവിദ്യകള്‍ ഉപയോഗിക്കുന്നതില്‍ മന്ത്രാലയത്തിന്റെ വര്‍ധിച്ചുവരുന്ന ശ്രദ്ധയെയാണ് ഈ നീക്കം പ്രതിഫലിപ്പിക്കുന്നത്.
സ്ത്രീക്ക് 20,000 ദിർഹംസ് നഷ്ടപരിഹാരം നൽകാൻ വിധിച്ച് അബുദാബി കോടതി
സ്ത്രീയുടെ ഫോട്ടോ അവരുടെ സമ്മതമില്ലാതെ സമൂഹമാധ്യമത്തിൽ പോസ്റ്റ് ചെയ്തയാൾ 20,000 ദിർഹംസ് നഷ്ടപരിഹാരം നൽകണമെന്ന് അബുദാബി കോടതി വിധിച്ചു. സ്വകാര്യതാ ലംഘനം സ്ത്രീക്ക് ധാർമ്മികവും മാനസികവുമായ ദോഷം വരുത്തിയെന്ന് സിവിൽ കോടതി നിരീക്ഷിച്ച് ശരിവെച്ചു. ഈ മാസം ആദ്യമാണ് സംഭവം നടന്നത്. പരാതിക്കാരിയുടെ സമ്മതമില്ലാതെ അവരുടെ ഫോട്ടോകളും വീഡിയോകളും സമൂഹ മാധ്യമത്തിൽ പ്രസിദ്ധീകരിച്ച പ്രതി കുറ്റക്കാരനാണെന്ന് കോടതി കണ്ടെത്തുകയായിരുന്നു. ഒക്ടോബർ 16 നാണ് അബുദാബി ഫാമിലി, സിവിൽ, അഡ്മിനിസ്ട്രേറ്റീവ് ക്ലെയിംസ് കോടതി വിധി പുറപ്പെടുവിച്ചത്.
വനിതാ ഡ്രൈവറെ അപകടത്തിൽ നിന്നും മിനിറ്റുകൾക്കുള്ളിൽ രക്ഷപ്പെടുത്തി ദുബായ് പോലീസ്
എമിറേറ്റ്സ് റോഡിലൂടെ അബുദാബിയിലേക്ക് സഞ്ചരിക്കുകയായിരുന്ന വാഹനത്തിന്റെ ക്രൂയിസ് കൺട്രോൾ സംവിധാനം തകരാറിലായതിനെ തുടർന്ന് നിയന്ത്രണം നഷ്ടപ്പെട്ട വനിതാ ഡ്രൈവറെ ദുബായ് പോലീസ് ട്രാഫിക് പട്രോളിംഗ് വിഭാഗം അതിവേഗത്തിൽ രക്ഷപ്പെടുത്തി. പോലീസിന്റെ സമയോചിതമായ ഇടപെടൽ വഴി ഒരു വലിയ അപകടമാണ് ഒഴിവായത്. ക്രൂയിസ് കൺട്രോൾ തകരാറിലായെന്ന റിപ്പോർട്ട് ലഭിച്ച് മിനിറ്റുകൾക്കുള്ളിൽ പ്രത്യേക പട്രോളിംഗ് സംഘങ്ങൾ എത്തിയിരുന്നു. വാഹനത്തിൻ്റെ വേഗത നിയന്ത്രിക്കാൻ കഴിയാത്ത ഒരു വനിതാ ഡ്രൈവർക്ക് കാർ ആക്‌സിലറേറ്ററിലോ ബ്രേക്കിലോ പ്രതികരിക്കാതെ നീങ്ങുന്നതായി ഓപ്പറേഷൻസ് റൂമിൽ റിപ്പോർട്ട് ലഭിച്ചതായി ദുബായ് പോലീസിലെ ജനറൽ ഡിപ്പാർട്ട്മെന്റ് ഓഫ് ട്രാഫിക് ഡയറക്‌ടർ പറഞ്ഞു.
തീരദേശ സുരക്ഷ ഉറപ്പാക്കുന്നതിൻ്റെ ഭാഗമായി ദുബായ് പോലീസ് ബീച്ച് പട്രോളിങ് കൂടുതൽ ശക്തമാക്കി. സമുദ്ര സുരക്ഷാ പ്രവർത്തനങ്ങളിൽ പൊതുജനങ്ങളുടെ പങ്കാളിത്തം ഉറപ്പാക്കുന്നതിനായി, കുട്ടികൾക്കായി പ്രത്യേക വേനൽക്കാല പരിശീലന പരിപാടികളും വിവിധ സന്നദ്ധ പ്രവർത്തനങ്ങളും സംഘടിപ്പിക്കുമെന്നും അധികൃതർ അറിയിച്ചു.
ബീച്ചുകളും തീരപ്രദേശങ്ങളും കൂടുതൽ സുരക്ഷിതമാക്കുക, അപകടങ്ങൾ കുറയ്ക്കുക എന്നിവയാണ് പട്രോളിങ് ശക്തിപ്പെടുത്തിയതിലൂടെ ലക്ഷ്യമിടുന്നത്.
മുന്നറിയിപ്പുമായി NCM
ഫുജൈറയിലെ മസാഫി പ്രദേശത്ത് ഇന്നലെ ഉച്ചകഴിഞ്ഞുണ്ടായ കനത്ത മഴയെത്തുടർന്ന് പാറകളും അവശിഷ്ടങ്ങളും റോഡുകളിലേക്ക് വീണു. പർവതനിരകളിലൂടെ നിരവധി വാഹനങ്ങൾ ജാഗ്രതയോടെയാണ് സഞ്ചരിച്ചത്.
യുഎഇയുടെ കിഴക്കൻ തീരത്തേക്ക് കാലാവസ്ഥാ വകുപ്പ് അപകടകരമായ കാലാവസ്ഥാ മുന്നറിയിപ്പ് നൽകിയിരുന്നു. കനത്ത മഴക്കാലത്ത് മണ്ണിടിച്ചിലും പാറക്കെട്ടുകളും വീഴാൻ സാധ്യതയുള്ള പ്രദേശങ്ങളിൽ വേഗത കുറയ്ക്കണമെന്നും ജാഗ്രത പാലിക്കണമെന്നും അധികൃതർ മുന്നറിയിപ്പ് നൽകി.
യുഎഇയിലും ലോകമെമ്പാടുമുള്ള ദീപാവലി ആഘോഷിക്കുന്ന എല്ലാവർക്കും യുഎഇയുടെ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഹിസ് ഹൈനസ് ഷെയ്ഖ് മുഹമ്മദ് ബിൻ റാഷിദ് അൽ മക്തൂം ദീപാവലി ആശംസകൾ നേർന്നു.
“യുഎഇയിലും ലോകമെമ്പാടും ദീപാവലി ആഘോഷിക്കുന്നവർക്ക് എൻ്റെ ഊഷ്മളമായ ആശംസകൾ. ഈ ദീപങ്ങളുടെ ഉത്സവം നിങ്ങൾക്കും നിങ്ങളുടെ പ്രിയപ്പെട്ടവർക്കും സമാധാനവും സുരക്ഷയും സമൃദ്ധിയും നൽകട്ടെ. ദീപാവലി ആശംസകൾ!” എന്ന് അദ്ദേഹം തന്റെ എക്സ് അക്കൗണ്ടിൽ കുറിച്ചു.
