ദുബായ് : യുഎഇയിൽ പേമെന്റ് സേവനങ്ങൾ ആരംഭിക്കുന്നതിനുള്ള നിർണായക ഘട്ടത്തിലേക്ക് കടന്ന് പ്രമുഖ ഇന്ത്യൻ ഫിൻടെക് കമ്പനിയായ ഫോൺപേ (PhonePe). യുഎഇ സെൻട്രൽ ബാങ്കിൽ നിന്ന് രണ്ട് ലൈസൻസുകൾക്കായുള്ള തത്വത്തിലുള്ള അംഗീകാരം (in-principle approval) കമ്പനിക്ക് ലഭിച്ചു. ഇന്ത്യൻ കമ്പനിയുടെ ആദ്യ അന്താരാഷ്ട്ര റെഗുലേറ്ററി ചുവടുവെപ്പാണിത്.
റീട്ടെയിൽ പേമെന്റ് സർവീസസ്, കാർഡ് സ്കീമുകൾ, സ്റ്റോർഡ് വാല്യൂ ഫെസിലിറ്റികൾ എന്നിവയ്ക്കുള്ള അനുമതിയാണ് പ്രാരംഭ നടപടികൾക്ക് ശേഷം ലഭിച്ചിരിക്കുന്നത്. യുഎഇയിൽ ഔദ്യോഗികമായി വാണിജ്യ പ്രവർത്തനങ്ങൾ ആരംഭിക്കുന്നതിന് മുൻപ് കമ്പനിക്ക് ഇനി അന്തിമ റെഗുലേറ്ററി അനുമതി കൂടി ലഭിക്കേണ്ടതുണ്ട്.
അന്തിമ അനുമതി ലഭിച്ചയുടൻ യുഎഇയിലെ പ്രാദേശിക ബാങ്കുകൾ, ലൈസൻസുള്ള പേമെന്റ് സർവീസ് ദാതാക്കൾ, ലോക്കൽ ടെക്നോളജി വെണ്ടർമാർ എന്നിവരുമായി ചേർന്ന് പ്രവർത്തിക്കാനാണ് കമ്പനിയുടെ പദ്ധതിയെന്ന് ഫോൺപേ വ്യക്തമാക്കി. യുഎഇയിലെ നിലവിലുള്ള ഡിജിറ്റൽ പേമെന്റ് സംവിധാനവുമായി പൂർണ്ണമായും സംയോജിക്കുകയാണ് ഇതിലൂടെ ലക്ഷ്യമിടുന്നത്.