മൻസോറി ഫെരാരി സൂപ്പർകാറുമായി ദുബായ് പോലീസ്

ദുബായ് : തങ്ങളുടെ പ്രശസ്തമായ ലക്ഷ്വറി പട്രോളിംഗ് വാഹനവ്യൂഹത്തിലേക്ക് അത്യാധുനിക മൻസോറി ഫെരാരി 812 സൂപ്പർഫാസ്റ്റ് (Mansory Ferrari 812 Superfast) സൂപ്പർകാർ കൂടി ഉൾപ്പെടുത്തി ദുബായ് പോലീസ്. പ്രമുഖ ജർമ്മൻ ആഡംബര വാഹന മോഡിഫിക്കേഷൻ കമ്പനിയായ ‘മൻസോറി’യുമായി (Mansory) ചേർന്നുള്ള ദുബായ് പോലീസിന്റെ അഞ്ചാമത് സഹകരണ പദ്ധതിയാണിത്. ദുബായ് വേൾഡ് ട്രേഡ് സെന്ററിൽ നടക്കുന്ന അറേബ്യൻ ട്രാവൽ മാർക്കറ്റിന്റെ ആദ്യ ദിനത്തിലാണ് പുതിയ സൂപ്പർകാർ ഔദ്യോഗികമായി അനാച്ഛാദനം ചെയ്തത്.
800 എച്ച്.പി (Horsepower) കരുത്തുള്ള ഈ വാഹനം കേവലം 2.8 സെക്കൻഡുകൾ കൊണ്ട് പൂജ്യത്തിൽ നിന്ന് 100 കിലോമീറ്റർ വേഗത കൈവരിക്കും. മണിക്കൂറിൽ 345 കിലോമീറ്ററാണ് ഇതിന്റെ പരമാവധി വേഗത. 6.5 ലിറ്റർ എഞ്ചിൻ ശേഷിയുള്ള ഈ ഫെരാരി കാറിന്റെ ബാഹ്യരൂപം മൻസോറി പൂർണ്ണമായും സ്പോർട്ടി ലുക്കിലാണ് പുനർരൂപകൽപ്പന ചെയ്തിരിക്കുന്നത്. ദുബായ് പോലീസ് ക്രിമിനൽ ഇൻവെസ്റ്റിഗേഷൻ അസിസ്റ്റന്റ് ഡയറക്ടർ ജനറൽ ബ്രിഗേഡിയർ ഒമർ അലി അൽ ഷെഹി, ടൂറിസ്റ്റ് പോലീസ് ഡയറക്ടർ കേണൽ മുഹമ്മദ് അബ്ദുൾ റഹ്മാൻ, മൻസോറി ജനറൽ മാനേജർ അഹമ്മദ് അബാദി എന്നിവരുടെ സാന്നിധ്യത്തിലാണ് വാഹനം പുറത്തിറക്കിയത്.