ദുബായ് ഹിന്ദു ക്ഷേത്രത്തിൽ ഗണേശ ചതുർത്ഥി ആഘോഷങ്ങൾക്കായി മാർഗ്ഗനിർദ്ദേശങ്ങൾ പുറപ്പെടുവിച്ചു

ദുബായ് : യുഎഇയിലെ ഇന്ത്യൻ പ്രവാസി ഭക്തർക്കായി 2026-ലെ ഗണേശ ചതുർത്ഥി ആഘോഷങ്ങളോടനുബന്ധിച്ച് പ്രത്യേക സുരക്ഷാ മാർഗ്ഗനിർദ്ദേശങ്ങൾ പുറപ്പെടുവിച്ച് ദുബായ് ഹിന്ദു ക്ഷേത്രം (Hindu Temple Dubai). പരിസ്ഥിതി സൗഹൃദപരവും സുരക്ഷിതവും അയൽപക്കങ്ങൾക്ക് ശല്യമുണ്ടാക്കാത്തതുമായ രീതിയിൽ ആഘോഷങ്ങൾ സംഘടിപ്പിക്കണമെന്ന് അധികൃതർ ഭക്തരോട് അഭ്യർത്ഥിച്ചു. യുഎഇയിലെ നിയമങ്ങളും പരിസ്ഥിതി നിയന്ത്രണങ്ങളും കർശനമായി പാലിച്ചുകൊണ്ടായിരിക്കണം ആഘോഷങ്ങളെന്ന് അധികൃതർ വ്യക്തമാക്കി.
ദുബായ് ഹിന്ദു ക്ഷേത്രത്തിലും അബുദാബിയിലെ ബാപ്സ് ഹിന്ദു മന്ദിറിലും (BAPS Hindu Mandir) ഉത്സവത്തോടനുബന്ധിച്ച് പ്രത്യേക പ്രാർത്ഥനാ ചടങ്ങുകൾ സംഘടിപ്പിക്കും. ഇന്ത്യക്കാർക്ക് പുറമെ നേപ്പാൾ, ശ്രീലങ്ക തുടങ്ങിയ അയൽരാജ്യങ്ങളിൽ നിന്നുള്ള ഹൈന്ദവ വിശ്വാസികൾക്കും ഒത്തുചേരാനും ആഘോഷങ്ങളിൽ പങ്കുചേരാനുമുള്ള അവസരമാണ് ക്ഷേത്രങ്ങളിൽ ഒരുക്കിയിരിക്കുന്നത്. വലിയ രീതിയിലുള്ള ഭക്തജനത്തിരക്ക് പ്രതീക്ഷിക്കുന്നതിനാൽ പ്രത്യേക ക്രമീകരണങ്ങളാണ് ക്ഷേത്ര മാനേജ്‌മെന്റ് പൂർത്തിയാക്കിയിരിക്കുന്നത്.