സൗദി തിരിച്ചുവിളിച്ച ഫീഡിംഗ് ബോട്ടിലുകൾ യുഎഇയിലില്ല

ദുബായ് : സുരക്ഷാ കാരണങ്ങളാൽ സൗദി അറേബ്യ തിരിച്ചുവിളിച്ച പ്രത്യേക ബ്രാൻഡ് ബേബി ഫീഡിംഗ് ബോട്ടിലുകൾ യുഎഇയിലെ പ്രമുഖ സൂപ്പർമാർക്കറ്റുകളിലോ ഫാർമസികളിലോ വിൽക്കുന്നില്ലെന്ന് ഉറപ്പുനൽകി യുഎഇയിലെ പ്രമുഖ റീട്ടെയിലർമാർ. ‘നർഷ്’ (Nursh 8oz) ബ്രാൻഡിന്റെ റീയൂസബിൾ കുപ്പികളാണ് (Product No. B11654) സൗദി വാണിജ്യ മന്ത്രാലയം വിപണിയിൽ നിന്ന് പിൻവലിക്കാൻ ഉത്തരവിട്ടത്. കുപ്പിയുടെ പുറംഭാഗത്തെ സുരക്ഷാ പാളി അടർന്നുപോവുകയും ഇത് കുട്ടികളുടെ ഉള്ളിൽ ചെന്ന് ശ്വാസംമുട്ടൽ ഉണ്ടാക്കാൻ സാധ്യതയുണ്ടെന്ന് കണ്ടെത്തിയതിനെ തുടർന്നായിരുന്നു സൗദിയുടെ നടപടി. എന്നാൽ സ്പിന്നീസ്, അൽ മദീന, നൈറ്റ് ടു നൈറ്റ് തുടങ്ങിയ യുഎഇയിലെ പ്രമുഖ റീട്ടെയിൽ ശൃംഖലകളും ഫാർമസികളും തങ്ങൾ ഈ ബ്രാൻഡ് വിൽക്കുന്നില്ലെന്ന് വ്യക്തമാക്കിയിട്ടുണ്ട്. എങ്കിലും വിദേശയാത്രകളിലോ അന്താരാഷ്ട്ര ഓൺലൈൻ സൈറ്റുകൾ വഴിയോ ഈ പ്രൊഡക്ട് നമ്പർ ഉള്ള കുപ്പികൾ വാങ്ങിയിട്ടുള്ള മാതാപിതാക്കൾ ഉണ്ടെങ്കിൽ അവ ഉപയോഗിക്കുന്നത് ഉടൻ നിർത്തണമെന്നും നിർദ്ദേശമുണ്ട്.